Aizawl: Hmarchhak state 15-a Catholic Bishop-te intawkhawmna, North East India Regional Bishops’ Council (NEIRBC) chuan Manipur-a hnam intihbuaina kalzel chungchangah thuchhuah siamin, buaina avanga tuartute an tuarpui thu leh, tharum thawhna leh inhuatna tuhna zawng zawng titawpin remna kawng zawng turin an ngen.
Bishop-te chuan Manipur-a nunna hlu tam tak an chan ta leh in leh lo tlansan a, biak in tam tak tihchhiat a awm mek chu pawi an tih thu an tar lang a. Lungawilohna chu, eng ang pawh awm mah ni se, tharum thawhnate, rawng taka in inhalsakna leh social media hmanga huatna tuhna hian tun harsatna hi engtinmah a chingfel thei lo dawn lo va, tharum thawhna chuan tharum thawhna bawk a hring a ni tiin an tar lang.
NEIRBC chuan Manipur mipuite zawng zawng hnenah a tipunlun zawng a tawngkam thlah te, thu puarpawleng thehdarh te, tharum thawhna leh phuba lakna te titawp vat turin an ngen bawk.
Hruaitu zawng zawng te, state leh central sorkar-te pawh tihtakzeta inbiakna leh dikna hmachhuana remna tluangtling thleng tura ke pen tur leh, tanpuina pek kawngah pawh thleibik nei lova kalpui vek turin an ngen a. Heng bakah hian tharum thawhna tuartu zawng zawngte thlei bik awm lova lo enkawl zui zel turin Kohhran hrang hrangte ngenin, rinna dik tak chu buaina awm lohna satliah ni lovin dikna, thudik leh inremna awmna a ni zawk tih tar langin, tharum thawhna hnar a inbiakna hmanga remna kawng zawh ho turin thinlung tha pu mi zawng zawng te hnenah tawngtai pui turin an ngen a ni.