Aizawl: Nagaland-a Faith Harvest Church Pastor, Shan Kikon hovin Zirtawpni zan atanga Vana Pa Hall-a buatsaih, ‘Thy Kingdom Come Conference’ chu Pathianni zan khan a tiak.
Pastor Kikon hi khawvel hmun hrang hranga ministry 10 chuang nena thawk hova rawngbawltu a ni a, conference hi zan tin dar 7-a neih thin a ni.
Thy Kingdom Come Conference hmang tura an thlen hnu hian Pastor Kikon leh a rawngbawlpui-te chuan Chief Minister Lalduhoma chu a pisaah hmuin a tawngtaisak a, a lehkhabu ziah, ‘First Step’ leh ‘Honour’ tihte an hlan bawk.
Chief minister pawhin Nagaland atanga Mizorama rawngbawl tura an kal chu lawmthu hrilhin kum thara Mizoram State Day of Prayer neih turah tel ve turin a sawm.
P&E Minister F. Rodingliana’n a ina zanriah a buatsaihsaknaah Pastor Kikon chuan khawvelah Kristian zinga doctrine leh degree tha tak tak nei tam mah se, a taka Pathian hnena inpek hi hnam tinin an mamawh tak tak a ni tih a sawi a. Mizoram leh Nagaland chu Kristian tamna ram an nih angin Kristianna an chawisan rualin hnam nun an hlamchhiah thiang lo va, hnam nun chawisang chung ngei pawha vanram kai theih a ni tih vawng reng turin a chah bawk.