Aizawl: Hachhek bialtu MLA Robert Romawia Royte-in Bible chuan dawt sawi a phal lo mai ni lovin dawt sawi thinte chu thlarau bawlhhlawh a ti hial tih a sawi.
Pang Zirlai Pawl Joint Headquarters, Aizawl-in Inrinnia Freshers Social leh zirlai tithate chawimawina, Aizawl Treasury Square-a I&PR Auditorium-a an buatsaih chu a hmanpuinaah Robert Romawia Royte chuan zirlai pass tharte a lawmpui thu a sawi a, tuna an thlen chinah duhtawk mai lo va, theihtawp chhuah a rinawm leh huaisen tak a hmalak a tul thu a sawi a. Zirlaite chu ram leh hnam tan eng nge an tih ve theih tih ngaihtuah ran chunga lehkha taima taka zir turin a fuih a ni.
Hachek bialtu MLA chuan, zirlai kalkhawmte chu central service-ah te tam zawk inziak tling thei tura tan nasa taka la tur leh tum mumal tak nei chung a lehkha zir turte, Pathian tiha nu leh pate chawimawi tur leh thawhrimna hmanga hlawhtlin tum tur tein a fuih a, zirna chu a tha zawnga danglamna thlentu a ni a ti.
Robert Romawia Royte chuan, “Bible chuan dawt sawi a phal lo mai ni lovin dawt sawi thin te chu thlarau bawlhhlawh a ti hial a. Hetiang anih laia Mizorama dawt leh thubelh chian dawl lo a leng vel chu Mizoram tan a pawi hle a ni,” a ti bawk.