Mizoram sorkar-a rorelna fawng chelhtu ZPM party chuan nimin khan an hruaitu thar tur puanchhuahna neiin, mipui rin lawk dan ang takin chief minister Lalduhoma chu an party president atan an ruat thu puan a ni.
Inthlan hmaa an lo inzawrh leh insawi tam dan ber, chief minister in party enkawlna hna thawk lovin, party chhung a ho lovang tih chu an bawhchhe tan ta phawt chu a ni a, mipuiteah engtinnge nghawng a neih chhoh ang tih chu hunin a hril zel turah ngai ang.
Dik tak chuan mipui tam takin an kalphung thar kha tha kan ti a, an kaldan kha fuh dawn hlein kan hria a, mipui tam tak an party chhungah luh phahin, sorkar-na hial an siam chho ta kha a ni a, an president thar ho hian mipui beisei an pha chho zel thei ang em maw?
An party-a awm tam tak hi lungawi lo thei an ni tawh a, kum a tawp tep a, kum 2028 inthlan a ni leh mai tawh si, nakkum lamah hi chuan party chhuahsan hi hrawl pui pui an awm lovang tih a sawi theih loh a, lungawi lo thawm hi a lian tulh tulh a rinawm bawk a ni.
President thar thuchhuah leh sawi tam tak hi helh an awm nghal dawn a, hun lokal zel turah an party tlin leh tlak tur hril tur thui tak a nih tawh dawn avangin mipuite pawhin chik takin kan lo thlir thiam chho zel a tul bawk awm e.