Colombia lailia ram kang nasa tak chuan khualzinte tlawh thin khaw lar tak, Villa de Leyva chu a tiderthawng mek niin tual chhung thuneituten an sawi.
Boyaca department-a Andean khaw bulah hian ram dangin an awp laia hmun an siam awmna leh kum tin mi maktaduai telin an tlawh thin, cobblestone street chung San Marcos tlang pang a kang mek a ni.
Hectare 40-a zau ram ngaw a kang chhe tawh a, van lamah a khu dum chhan tak chhuahin khaw chhunga central square atang pawhin a hmuh theih tih Colombian thuneituten an sawi.
Inrinni zan (India-a Pathianni chawhma) khan Colombian President Abelardo de la Espriella-a chuan X-ah Villa de Leyva khua chauh ni lovin ramin ‘hmun hlu leh Colombia-in a chhuah khawpui mawi’ chhan leh humhim nan a theih ang zawng zawng a tih dawn thu a tar lang.
Kang thelh nan Boyaca department sorkar chuan thlawhna pahnih a hmang a. Sipai helicopter-in a pui a, an khawpui, Bogota atangin kang thelhtu tirh an ni bawk tih Interior Minister Rodrigo Lara chuan a sawi.
Bogota Mayor Carlos Fernando Galan-a pawhin Tunja leh Boyaco-a kang thelhtute pui tur kang thelhtu pawl a tir dawn tih Lara chuan a sawi bawk.
Equator-in a kaltlangna lai vel, Andes tlangah hian khaw ro laiin ram a kang duh hle thin a, kuminah phei chuan El Nino avanga khua a ro zual avangin a kang nasa zual a. Khua a lum bawk a, hei hian tlanga hnim hringte a tiro nasa hle a. Hei vang hian an ram hmun 18-ah ram a kang mek niin Colombia-a National Unit for Disaster Risk Management (UNGRD) chuan a sawi.
El Nino hian khawvel pumah nghawng a nei a, South America-ah hian hmun hrang hrangah an tawrh dan a inang lo hlawm a. Thenkhatah khua a khen phah laiin hmun dangah tui lian a thlen a. Kuminah hian sik leh sa inthlak nasain a nghawng a tina zual a, scientist, sorkar leh tanpuitu pawlte pawh an buai zual phah.