UEFA leh Concacaf chuan FIFA President Gianni Infantino hnenah lehkha thawnin FIFA pawisa khawl atangin an hnuaia ram 211 hnenah a tlem berah $ maktaduai 10 (£ maktaduai 7.5) theuh pe turin an phut.
Hei hi pawl lian hrang hrangte inkara hun eng emaw chen inbiakna chungchanga thil thar ber a ni a, FIFA President Infantino-a’n private equity rawtna a sut leh tak hnuah boruak a fuh thei meuh lo a ni.
Fifa Forward Enterprise (FFE) hian company thar din a, World Cup telin inelna zawng zawng commercial leh ticketing rights enkawl leh 21% chu investment company hnena hralh an rawt a. He rawtna hi ram hrang hrang football association-te dodalna a nasat avangin ni li hnuah tihtawp a ni leh ta a ni.
BBC Sport-in a hmuh lehkha thawnah hian UEFA President Aleksander Ceferin leh Concacaf President Victor Montagliani te hming a chuang a ni.
Lehkha thawnah chuan ‘FIFA hian 2023-26 chhung hian pawisa khawl $ tluklehdingawn 6 (£ tluklehdingawn 4.5) vel a nei dawn’ tih tar lan a ni a, hei hi kum 2023 atanga kum 2030 mipa World Cup thleng pawha mamawh aia tam daih a ni tih an sawi.
FIFA chu 2027-30 chhungin an hnuaia ram 211-te hnenah a tlem berah $ maktaduai 10 theuh pe chhuak turin an phut a, he sum hi infrastructure leh football tihmasawn nana hman tur a ni bawk.
Pawisa khawl atanga vawi khat sem chhuahnaah hian $ tluklehdingawn 2.11 (£ tluklehdingawn 1.57) an seng dawn a, hei hi a pangngaia funding an hmuh thin bak a ni ang.
He chanchin hi Football Association chair Debbie Hewitt-i’n Infantino leh FIFA Secretary General Mattias Grafstrom hnenah FFE ruahmanna nena inkaihhnawh document zawng zawng tichhuak tura lehkha a thawn hnu ni khatah a chhuak a ni.
FIFA Vice President Hewitt-i chuan FIFA Council hian World Cup-a US forward Folarin Balogun hremna hlih a nih chhan chungchangah ziaka hrilh fiahna an dawng bawk tur a ni tih a sawi.
Infantino hi October 15-a FIFA Council meeting neih leh hma ngeia document zawng zawng pe chhuak turin hrilh a ni.
Kum 56 mi, Infantino hi March thlaa a tum lina atan inthlannaah a ding leh dawn a, a khingpuite hian candidate thar zawn nan November 18 thleng hun an nei a ni.