Tourism Minister Lalnghinglova Hmar chuan Mizoramah khualzin lo kal se an tih rualin a chhunga chengten an ram mawinate hi an ngaihsana an tlawhpawh hmasak a pawimawh tih a sawi.
Mizorama a vawikhatna atan tourism department leh Khawzawl DC Office tangkawp buatsaih, ni thum awh tur ‘Pluck and Pay Festival’ chu Nilaini khan Vanhnuailiana Hall, Tualte-ah tourism minister-in khuallian a hawng a. Mizoram boruak thianghlim, leilung mawina leh thing leh maute hi khualzin hiptu pawimawh tak an nih thu sawiin heng an hausaknate pho chhuahna tura festival buatsaih a ni chu lawmawm a tih thu a sawi.
Khualzin mi dang lo kal se an tih rualin Mizoram chhunga chengten an ram mawinate hi an ngaihsana an tlawhpawh hmasak a pawimawh tih sawiin, mipuite chu an ram mawina thehdarhtu ambassador nih tum turin a chah a. Tualte leh Chawngtlai mipuite thawhrimna fak chungin festival buatsaihna kawnga department hrang hrang thawhhona tha tak awm chu hmalakna hlawhtlinna phurtu a nih thu a sawi.
September 23 atanga 25, 2026 chhung awh tur he festival hi plastic tel lova ‘Green Festival’ anga hman a ni a, Tualte leh Chawngtlai khuaa kuthnathawktute thawhrimna hriatpui bakah, an thei leh thlai tharte mipuiin an huan thleng tlawha an lo (pluck) a an lei (pay) zui theihna tura buatsaih a ni.
He festival chhung hian mipui tlawh theih turin Tualte-ah sapthei, fanghma, tomato leh bean huan 14 thlan chhuah a ni a; Chawngtlaiah kiwi, sapthei leh tomato huan 13 thlan chhuah a ni.