US President Donald Trump-a chuan Washington-ah tun kar hian Chinese hruaitu, Xi Jinping-a a mikhual a. Khawvela ram thiltithei ber ber pahnih hruaitute hian AI, sumdawnna leh Taiwan chungchangte chu an sawi dun langsar ni tura ngaih a ni.
Xi-a hi Trump-a hian Andrews Air Force Base-ah lo hmuakin White House-ah zanriah a kilpui zui a, military flyover nen dawnsawn a ni.
Ni thum chhung Xi-a’n US a tlawh hi kum 2015 hnua a hmasa leh ber niin nikum atanga Trump-a nen an inkawm vawi thumna tur a ni thung.
Xi-a’n US a tlawh mek lai hian nikuma US-China trade agreement an siam chu November-ah hian a tawp dawn chiah a ni.
Sumdawnna thila an inrintawnna, October, 2025-a an siam hi South Korea-a Trump-a leh Xi-a an inkawm tuma an siam niin Washington-in Chinese bungrua a lak luha chhiah a tihsan vak tihtawp lailawkna a ni a, Beijing-in leilung hausakna vâng chi thawn chhuah a khuahkhirhna tihtawp lailawkna a ni ve thung.
Mi thiamte chuan tun tuma Chinese hruaituin Washington a tlawh chhung hian thil pawimawh tak tak an puan an ring a, an inremna neih pawh an pawh sei an beisei bawk.
Xi-a hian Zirtawpniah Washington a chhuahsan dawn a, a cham chhung hian intihhlimna lam pawh entir a ni ang a, zanriah tuihnai, mikhual pual zin veivah leh hmuhnawm thlir tur chhawp an ni bawk ang.
First Lady Peng Liyuan-i’n a tawiawm dawn a, Ningani hian US First Lady Melania Trump-i nen Smithsonian National Museum of Asian Art an tlawh.