Manipur-ah tharum thawhna a thleng zel a, Nilaini khan Tamenglong district-ah mi mala thawk electric lineman kah hlum a ni a, a hnu lawkah an thenawm, Kangpokpi district-a Naga khaw pahnihah in 24 vel hal a ni bawk.
Tharum thawhna thlengte hian Naga leh Kuki inkar boruak a tisosang zel a, tlangram district hrang hrangah himna a derthawng hle.
Inkah hlumna hi Tamenglong district-a Lasan khua, Tamei Police Station atanga khawchhak lam km 29 velah zing dar 4:00 vela thleng a ni a. Police chuan ralthuam kengten kum 36 mi, Wakotphai khua, Paojangam Chongloi-a chu 33 KV power line a siam laiin an kap hlum tih an sawi a. A ruang hi Kangpokpi District Hospital-ah lak a ni.
Tamei Police Station officer-in-charge chuan thil thlenna hmun hi a kilkhawr em avangin police an la thleng mai thei rih lo tih a sawi.
“Ka team an thleng thei lo va, Kangpokpi Police chu a hmuna kala dan anga hma lak ngaiah min pui turin kan ngen a ni,” tiin a sawi.
Wakotphai khaw VC Secretary Thanggunhao Hangshing-a chuan inthahna thlengah hian police hnenah thubuai a thehlut a. Hetah hian National Socialist Council of Nagaland (NSCN-IM) chu a titu niin puh an ni a, a dik em tih erawh hriat a la ni lo.
Inthahna a thlen hnu lawkah hian ralthuam kengten Kangpokpi district-a Chamruioiu an tih bawk, Makui Khuman leh Makui Thanamba-ah in tam tak an hal nia sawi a ni.
Khaw pahnihte hi police station atanga km 15 vela hla niin km 2/3 vel kar dana awm a ni.
Makui Khuman khuaa cheng pakhat chuan an khua chu zing dar 5:00 vela beih niin a sawi a, pakhat an beih hnuah pakhat an khawih zui leh niin a sawi.
Khaw pahnihah hian in 12 vel emaw ve ve an awm a, an zavai hian Naga-Kuki buaina avanga tlanchhiain km 12 vela hla, Makui Khunjao-a an awm vek lai a ni.
“Kan khua kan va thlen chuan khaw pahniha in awm zawng zawng (24) chu meivapah a lo chang vek tawh a ni,” a ti a, khaw pahnihah hian venhim hna thawktu tumah an awm lo tih a sawi bawk.
September 1 leh 2 khan mi tu tih hriat lohten in 25 vel an lo hal tawh bawk.
Tun thla kal mekah hian Tamenglong district-ah tharum thawhna a thleng tam ta hle a. Thawhtanni khan Naga rawlthar kum 17 mi chu amaha Upper Nkou khua atanga Tamei khuaa mamawh leia a kal thah a ni a. Police chuan Naga village volunteer-ten a ruang hi kawng zim lai takah an chhar tih an sawi.
September 15 khan Kuki hmeichhe pahnih, kum 60 mi, Chonga Sitlhou leh kum 30 mi, Kimboi Singson te chu Leisangphai khuaa thing an fawm lai kah hlum an ni.
Thlam pawh eng emaw zat hal nia sawi a ni a. He beihna thlen hma ni hnihah Tamenglong leh an thenawma Noney district-a inbeihna thlengah mi pali thah an ni bawk.
Manipur-ah hian May, 2023 atang khan Meitei leh Kuki inkarah buaina chhuak tanin a huam a zau zel a, tunah chuan Naga a kang kai tawh.
Thuneitute chuan buaina chhuah tan atang hian mi 300 thi an awm tawh a, mi sang tel tlanchhia an awm tawh bawk niin an sawi.
Inbeihna thar a thleng zel a, thuneitute chuan Nilainia inthahna leh in halna thlengte hi chhui an tum a, a mawhphurtu hriat chhuaha khaw him lo zual deuhvah venhim hna thawktu dah dan pawh an ngaihtuah nghal.
Hnam hrang hrangte hian tharum thawhna thleng chhui hna hi a chak lo va, tan lam neia chhui a ni fo niin an sawi a. Hetiang ni lova kimchang taka chhui leh civil mite himna tura hmalak an phut.