Tourism Minister Lalnghinglova Hmar chuan khawvel hmaa Mizoram leilung mawina leh Zo nunze mawite pho lang zel turin Zoram mipui a chah.
He thu hi Pathiannia ‘World Tourism Day’ puala Mizoram mipuite hnena chibai a buknaah sawiin, tourism minister chuan Mizoram chu khualzinte tlawh chakawm ram leh hmun nuam ber bawk a ni tih a sawi a. Ram dang pan kher lova Mizo leh Mizote pawh ram chhung hmun hrang hranga intlawhtawn a, mahni ram ngei tun aia nasa zawka hre chiang turin mipuite a fuih a ni.
Minister chuan mahni ram hriat chiang leh ngaihhlut a pawimawh zia sawiin, hei hian khualzin thahnem zawk a hip lut thei dawn a ni, a ti a. Mizoram leilung mawina te, boruak thianghlim leh sik leh sa danglam bik takte chu khawvel hmun danga mipuiten an tlawh duh tur a nih avangin, heng Mizoram mawinate leh khualchhawn an thiamna ‘Zo nunze mawi’ takte hi hmang tangkaia pholang zel turin mipuite a sawm nghal bawk.