Bantamweight seed sang ber, L Joseph Buihringpachha chuan Thawhlehni zanah Mizoram Labour Link LPS Pro Fight quarterfinal a lut a, a inhnek hmasak berah technical knockout-in Lalrinsanga a hneh.
LPS Arena, Falkland-ah mittlung takin College Vaih, Siaha rawlthar a inlan nghal a, round of 16 a luh thlengin Thingsulthliah boxer Rinsanga’n a bitumte aia hnek thui zawk a nihna thiam taka hmangin a khel tha chho hle a. Mahse, kum 17 mi, Joseph-a’n thiamna leh theihna hrang hrang hmangin a awpbet nghal a, chiang taka a hnek fuh hnuah vawi 10 vel hnek zawnin an kut a inran hleih a, Rinsang talbuai awmze neiin a chhang let ve thei lo.
Round hnihnaah Joseph-a’n vawi thum hnek zawnin kum 18 mi, Rinsanga a tlu a, tho lehin bei zui mah se Siaha rawltharin nuam ti takin a nawr zui a, round hnihna laihawlah an inhnek tawk loh em avangin referee Lalrinhlui’n a titawp.
Pro Fight-a a tel vawi khatna niin a inhnek hmasak berah Joseph-a’n Orient Goldsmith Fighter of the Night lawmman a dawng a, Laldinsanga kalsan bantam champion kawnghren rochun turin rin a hlawh tel nghal bawk.
Round of 16 inhnek dangah seed pek zinga mi, Dolrich Zothansanga’n Tuirial boxer C Lalruatfela lakah fiahna a pal tlang hram bawk a, split decision-in a chak.
Mualcheng South tlangval, Dolrich-a hian thiamna leh tawn hriat nei tha zawk a ni tih lantir mah se inhnek a thunun zo bik lo a, tha taka inveng chungin Ruatfela’n a hnek fuh fo a, bantam quarterfinal-ah khel tha tak Joseph-a nen an intawn a ngai dawn a, hmasawn a mamawh dawn hle a ni.
Fly-ah Alfred Lalrinsiama, Lalhriatzela leh PC Lalremruata ten round of 16 an lut ve thung a, Zirtawpni zanah an pathumin seeded boxer an inhnekpui leh vek ang.
Rinsiama’n C Zosangmawia, Chaltlang); Hriatzela’n R Lalhminghlua, Maubawk; Remruata’n Moses Lalruatfela, Lawngtlai Vengpui an hmachhawn dawn a ni.
A sang 16 zinga intat lut turin Rangvamual boxer Rinsiama’n split decision-in Rommel Malsawmdawngliana, Lungtian a hneh hram a, chet vel awlsam leh hnek chhuah awlsam zawk a nihna chhawrin judge pahnihin 29-28-in an chaktir a ni.
Maubawk rawlthar, Hriatzela’n Churachandpur, Manipur boxer Jangkhochon Lupho lakah round hnih lain judge pathumin 29-28 vekin an chaktir ve thung a. Bilkhawthlir tlangval, Remruata’n inhnek thununin Lamka boxer Mangmuanlian lakah round thum a la vek a ni.