Aizawl: LESDE Minister Lalnghinglova Hmar chuan Govt. Aizawl West College ‘34th Annual College Week’ kharna inkhawm chu Vana Pa Hall-ah khuallian niin Nilaini khan a hmanpui.
Lalnghinglova Hmar chuan Mizote communication skills-ah hnam dang an pha lo fo va, college chhuahsan hnuah thil a pawimawh avangin pianpui tawng bakah tawng chi khat tal thiam chhunzawm a tul thu a sawi.
Tourism sector a thang nasa zel a, inbuatsaihna leh sensitisation mumal tak neih a pawimawh thu sawiin, communication skill nei tha zirlaite tan eizawnna tha tak a awm thei tih a sawi bawk.
Sports minister ni bawk chuan Bana Kaih hnuaia ‘Empowering Mizoram Sports (EMS)’ hmangin 2036 Olympics thlir chungin kum 8 atanga 15 inkar talent hai chhuah hmalakna a kal mek thu a sawi.
Minister chuan ruihhlo laka fihlim a pawimawhzia sawiin, ruihhlo thenkhat rem tawh mah se thalai zawkte zinga hluar thar te chu a lo luh dan kawng chhui mekin tirem tura hma an lak zel thu a sawi a. Zirlai inhlawh thinte tan Mizoram Building & Other Construction Workers Welfare Board (MBOCWWB) hnuaia inziahluh pawimawhzia leh hamthatna dawn theih te sawiin, a bial chhung Aizawl West II-a zirlaite nen hun remchangah interactive session neih a duh thu a sawi bawk.
Week kharna inkhawmah hian Principal Dr. PL. Ramliana’n lawmthu sawiin, Students’ Union General Secretary H. Lalbiakzauva’n report a pe a, week chhunga tithate hnenah medal leh certificate semna hun hman a ni.