Aizawl: ZPM Thalai-in MNF kaihhruai Aizawl Municipal Corporation sorkarin hman tlak loh incinerator leiah an puh a. Hemi chungchang hi MNF president leh mayor hluite mipui hmaa ngaihdam dil turin an phut.
ZPM Thalai chuan AMC sorkar hmasain Tuirial Solid Waste Management Centre-a bawlhhlawh hal ralna khawl (incinerator) hman tlak loh Rs vbc 2.60 laia an lei chu, mipui sum nuai tam tak a thlawna luan ral tirtu leh he khawl tha lo lei duhtute zawng zawng mawhphurhna an lak a ngai a ni tiin, MNF President Zoramthanga leh AMC Mayor hlui Lalrinenga Sailo te chu October thla chhung ngei hian mipui hmaah ngaihdam dil turin an phut tlat thu an tar lang.
ZPM Thalai tar lan danin, RTI chhanna leh vawi duai lo an tlawh atanga a lan danin AMC chuan September 7, 2022 khan he incinerator khawl hi Aegis Smart Logix India Private Limited, Hyderabad hnen atangin Rs 2,60,78,000 senga leiin, a man atang hian zaa 90 (Rs 2,34,70,000) an pe tawh a ni.
Suppy order-ah thla thum chhunga bun fel tura tih ni mah se, kum li a liam hnu pawha enchhinna vawi hnih an neih atangin official-a hman theih a la ni lo va. Darkar 24 chhungin bawlhhlawh kg 10,000 hal ral thei tura beisei a nih laiin, a khawl that lai ber pawhin kg 500 atanga 600 chauh an hal ral thei a ni.
He khawl hi a nihna tura hman tan a nih hma hauhin a chhe tawh a, warranty period pawh a zawh tawh avangin siam tha leh tur chuan sorkar sum hman nawn a ngai dawn nia tar lan a ni bawk.
Pollution Control Board atanga environmental clearance pawh hmu hlei lo khawl hman tlak loh lei a nih avangin, ZPM kaihhruai sorkar chuan a thar lei nan hma a lak mai a ngai ta a ni tiin ZPM tthalai chuan an tar lang a, MNF hruaitu hluite chu mipui hmaah mawhphurhna laa ngaihdam dil turin an phut a ni.