Aizawl: MNF chuan ZPM kaihhruai sorkar chu sum enkawl dan thiam lo leh dik loah puhin kumin (2026-27) sorkar kum chanve ral tawhah pawh sorkar laipui atanga SASCI sum cheng khat mah a la hmuh loh chhan chungchangah chief minister leh finance minister chelhtu, Lalduhoma chu sawi fiah turin an phut.
MNF thuchhuah tar lan danin India-a state dang zawng zawngin infrastructure hmasawnna tura a pung awm lova kum 50 hnua rulh tur loan (SASCI) hi hmang thain vaibelchhe sangbi an hmuh thin laiin Mizoram erawh chuan ZPM sorkar a pian atangin harsatna lian tak an tawk mek a ni.
RTI atanga finance ministry hnuaia department of expenditure-in October 1, 2026-a chhanna an hmuh tar langin MNF chuan ZPM sorkar chuan kum 2023-24 chhung khan SASCI sum sanction sa Rs vbc 233.31 an ti-lapse vek a, kum 2025-26-ah sanction sa bawk Rs vbc 111.52 an ti-lapse leh a ni tiin an sawi.
Sorkar laipui sum tam tak chu a hmanna tur taka hmang nghal lovin hlawhah leh thil dangah te a hman hmasak thin avangin heng harsatnate hi a thleng ta nia sawiin kum hmasa lama SASCI sum a taka pe chhuak si lova utilisation certificate (UC) siam mai thin pawh pawi an tih thu an tarlang bawk.
Hmarchhak state dang pasarihte chuan SASCI sum tam tak an hmuh laia Mizoramin cheng hnih khat pawh an la hmu ve lo chu sorkar sum enkawlnaah fel lohna lian tak a awm chiang a ni tiin MNF chuan an tar lang a. Tun hnuah sum pe chhuak lova UC siam a nih leh tawh loh nan an ngaihven tlat dawn a, thil dik lo a awm a nih chuan sorkar laipui thuneitute hnen thleng pawha an thlen zel dante a thuchhuahah hian an tar lang bawk a ni.