- Zoliansanga Tlau
“Tin, Barnaban Johana (Marka an tih chu) an hnenah hruai a tum a. Paula erawh chuan ani chu an hnena hruai tha a ti lo, Pamphulia ramah anmahni a kirsana, hnathawhnaa an hnena a kal ve tak loh avang khan. Tichuan, nasa takin an inhnial ta a; chuti chuan an inthen a, Barnaban Marka chu a hnenah a hruai a, Kupra thliarkar lamah lawngin an kal ta a. Paula erawh chuan Sila a thlang a, unauten Lalpa khawngaihnaa an kawltir hnuin a kal chhuak ta a.” – Tirhkohte 15:37 – 40
Barnaba leh Paula te zin chhuah vawi khatnaah khan Johana Marka hian a zui ve a. Mahse, Pamphulia rama Perga khua atangin Jerusalem-ah a kirsan leh ta daih a. Hei vang hian Barnaba leh Paula-te zin chhuah tum hnihnaah chuan Paula’n Johana Marka chu hruai ve tawh lo duh a, Barnaba nen in hnial vakin Barnaba’n Johana Marka a hruai a, Paula’n sila a hruai ve thung a. Hemi tuma Marka kir leh chhan leh Paula leh Barnaba chungchang hetiang hian Ellen G. White-in a ziak, “Paula leh a thiante chu an zin zui zel a, Pamphulia rama Perga khua an thleng a. An zin kawng chu a hahthlak hle mai; harsatna leh tlakchhamnate an tawk thin a, kil tin atangin hlauhawmin a hual thin…he laiah hian a ni, Marka pawh kha hlau leh beidawnga a lo awm tak ni; Lalpa hna thawhna atana a inpumpekna pawh chu a lo nghing ta hial a; harsatnate la tawk thang ve lo a ni a, kalkawnga tlakchhamna leh hlauhawmna te an han tawh chuan a lo lunghnur ta a ni. Hun ralmuangah chuan hlawhtling takin a thawk a, nimahsela tunah hian ram thar daipawp tute’n dodalna leh hlauhawm an lo tawh fo chu a han tawk ve tan a, kraws sipai tha angin a do chhuak ve zo lo a ni. Thinlung huai taka hlauhawm te, tih duhdahna te, hmelma te chu do a ngaihzia a zir a la tul rih a ni e. Tirhkohte lah chuan hma lam an pan zel mai si a, harsatna lah a lo tam tial tial a, Marka chu a zam nasa ta mai a, a huaisenna zawng zawng chu hlohin kal ve zel a duh ta lo va, Jerusalemah a kir leh ta a ni”.
“Hun eng emaw ti chhung chu Paula pawhin Marka chu a lawm lo tak zel a ni. Barnaba erawh chuan thil la tawk thang ve lo a ni tih a hriat avangin a ngaithiam thei a. Krista tana rawngbawltu tangkai tak ni thei tura tlinna chu nei tlata a hriat avangin Marka chuan rawngbawlna bansan mai lo se a ti em em a ni. Marka tana a dilna chuan kum eng emaw zat hnuah chuan rah ropui tak a rawn chhuah ta a; he tlangval hian bang awm miah lovin Lalpa hnenah inhlanin, hmun harsa zawkahte pawh chanchin tha puang turin a lo inhlan zo ta thlak mai a ni. Pathian malsawmna avang leh Barnaba zirtirna fing tak avang chuan hna thawktu hlu tak maiah a lo thang lian chho ta a ni” (Tirhkohte Thiltih, p.169-170) tiin.
Hemi tumah hi chuan Krista tana pasaltha ropui tirhkoh Paula aiin Barnaba a ropui tlat mai. Barnaba tih awmzia chu ‘Thlamuanna Fa’ tihna a ni a. Barnaba chu Levia chi, Kupra thliarkara ringtu hmasate tan, a in leh lo hralh a, a man zawng zawng a bo a bang awm lo va tirhkohte bula rawn hlantu kha niin, Paula dawm kangtu pawimawh tak niin Barnaba hming dang chu Josefa a ni bawk (Mizo (Lushai) – (O.V.) Re-edited ‘17, Tirhkohte 4:36, 37).
‘Thlamuanna Fa’ tiha ‘The Holy Bible, (Mizo [Lushai] – [O.V.] Re-edited ‘17’ BSI Version) tia lehlin hi NKJV-ah chuan ‘Son of Encouragement’ tiin a inziak a. Grik tawng a hman pawh ‘parakleseos’ tih niin – hnem, chhawk (comfort), infuihna, thathona (encouragement), fuihna, turna (exhortation), thlamuanna, hnemna (consolation) tihna a ni. NKJV ang chuan ‘Fuih phurna Fa’ emaw ‘Thathona Fa’ emaw tihna a ni ang. A hming a pu zo hle. An nih tur ang ni thei ve ve tura tirkoh Paula dawm kangtu leh Johana Marka ti thatho a, fuih phurtu a ni. Ziak mi pakhat pawhin, “Barnaba hian Paula hun hmasa lamah khan lo tawiawm tha hle lo sela chuan, Paula chanchin hi a danglam daih thei hial ang” a ti. Marka pawh chutiang tho chu a ni ang.
Antiokei khuaa kohhran enkawl turin Barnaba chu tirh a ni a. Khua a va thlen chuan “thahnemngai taka Lalpa vuan reng turin an zain a fuih ta a”. Pathian mi hman niin “mi tha tak a ni a, Thlarau Thianghlim leh rinnaa khat a ni”. Hemi avang hi a ni ang “Lalpa hnenah an tel belhchhah ta a” (Tirhkohte 11: 23, 24) tih thu kan hriat theih ni. Antiokei khuaa Barnaba a awm hnuah Saula zawngin ani nen kum khat zet Antiokei inkhawmnaah an tel dun thin a, mi tam tak an zirtir thin a. Antiokei khuaah hian zirtirteho chu ‘Kristian’ an tih hmasak berna hmun a ni ta nghe nghe bawk a ni (Tirhkohte 11 :25). Chanchin tha Mark hi Johan Marka ziak a ni a. Chanchin tha bu zinga ziak hmasak ber niin mi thiamte chuan an ngai. Barnaba awm lo selang chuan Chanchin tha Marka ziak hi kan hmu lo mai thei a ni.
Tirhkoh Paula leh Johana Marka hi an haw zui zel lo a ani ang, Paula’n “ka hnathawhpui Marka te, Aristarka te, Dema te, Luka te pawhin chutiang bawkin an buk a che” a ti a. Tin, an inrem leh tih chiang taka tarlantu chu, Paula’n Barnaba hnena “Marka kha sawm la, han hruai ve rawh, ani chu rawngbawl lamah ka tan a tangkai si a” (II Tim. 4:11) a ti bawk.
Barnaba ang a mite chher puitling a, hruaitu leh ti thathoa ti phurtu nih a va pawimawh em. Tirhkoh Paula anga ngaidamtu nih pawh a hlu. Marka anga chauh chang nei; mahse, chanchintha bu ziak theih nih pawh a ropui bawk.