Aizawl: BJP Mizoram Prabhari Bhagwat Karad chuan kum 2028 Mizoram assembly inthlan lo awm turah sorkarna siam ngei tura theihtawp chhuah an tum thu a sawi.
Thawhtannia BJP Mizoramin Upper Republic-a an pisa-ah Karthar Inhlanna leh Political Session an nei. He hun hian BJP State Prabhari leh Union Minister of State for Finance hlui Bhagwat Karad chuan thu sawiin, Mizoram chu ram ralmuang leh lehkhathiam tamna a nih thu leh, kum 2028-a sorkarna an siam ngei theih nan party official leh member zawng zawngte mawhphurhna la a, theihtawp chhuah turin a ngen.
Prime Minister Narendra Modi-a kaihhruaina hnuaiah ‘Viksit Bharat’ leh ‘Sabka Saath, Sabka Vikas’ thupui te chu, hnam leh sakhaw thliar hran awm lova mi tin tana hmasawnna thlen a nih thu leh, PM scheme hrang hrangte mipui hnen an thlen chhunzawm zel tur thu a sawi bawk.
BJP NE Co-coordinator Rajiv Babar pawhin thu sawiin, PM Modi sorkar hnu hian India ramah hmasawnna nasa takin a thleng a, India ram hian vawiinah chuan inthlakdanglamna nasa tak a neih phah tih a sawi a. “Mizoramah hian BJP kan sorkar theih lohna chhan tur a awm lo va. A chhan chu, BJP thil tum Sabka Saath, Sabka Vikas, Sabka Vishwas, Sabka Prayas tih hi kan thupui a ni a, mi tin huap hmasawnna, mi tin thawhrimna, mi zawng zawng tana hmasawnna thlensak hi kan thupui a ni a, chumi thlenna atana pawimawh em em chu PM scheme hrang hrangte hi a mamawhtu tak tak hnen thlen a ni a, chung chu mipui hnenah uluk takin kan sawi thin a pawimawh hle a ni,” a ti.