Aizawl: Kaladan Multi-Modal Transit Transport Project (KMMTTP) hnuaia Paletwa leh Zorinpui kawng siam hna thawktute chu larsap General (Dr) Vijay Kumar Singh chuan Thawhtanni khan Lok Bhavan, Aizawlah kawmin, project khawtlai zel chu pawm theih a nih tawh loh avangin fur ruahtui hul veleh hna chak taka chhunzawm tawh turin a chah.
IRCON International Ltd., Myanmar Branch-a Project Head Sanjay Tripathi chuan larsap hnenah Paletwa atanga Zorinpui inkar km 109.2-a thui kawng siam meka an hmalak tawh chin leh hmachhawp te PowerPoint Presentation hmangin a hrilhfiah a. Tun dinhmunah KMMTTP hnuaia he kawng siam hna hi za zela 25 thawh zawh a ni tawh a, budget ruahman atanga za zela 30 hman a ni tawh bawk.
Larsap chuan he project hi sorkar laipui tana hmasawnna kawng pawimawh a nih avangin an tihkhawtlai zel a thiang tawh lo tiin, a hma thei ang bera he project hi zawhfel a nih theih nan IRCON hotute chu tan la tur leh mamawh a awm anih pawha a hnena thlen hreh lo tura chahin, he hmasawnna hna zawh thuai a nih theihnan puih a inhuam reng thu a hrilh a ni.