Aizawl: Sports Minister Lalnghinglova Hmar hovin Thawhlehni khan a pisa-ah ‘Winter Run Mizoram’ neih dan tur sawiho a ni a; Winter Run hi December 12, 2026 zan dar 8-ah Lammual atanga tlan chhuakin, inelna ni lovin rilru leh taksa hriselna chawi lar nana ‘Fun Run’ anga buatsaih tura ruahman a ni.
Lalnghinglova Hmar chuan he ‘Winter Run Mizoram’ hi Winter Festival khuhhawnna atana ruahman a nih thu sawiin, mipui nawlpui tel theihna leh taksa hriselna promote thei thil danglam tak a nih avangin thalai leh nu leh pa a tam thei ang ber tel turin a sawm nghal a ni.
He tlan hi kilometer 5-a thui niin, Lammual atanga tanin Sikulpuikawn, Zodin, leh Chanmari kaltlangin Lammual-ah bawk let leh tura ruahman a ni. Zana tlan tur a nih avangin kum 14 chin chunglam bakah, a aia naupang te pawh an nu leh pa emaw, guardian emaw te nen an tel thei ang.
Winter Run-ah hian registration fee Rs. 100 a awm dawn a, intlansiak zawhah Lammualah fitness hmanga inelna hrang hrang ‘post run contest’ leh zaithiam te nen concert buatsaih tur a nih bakah lawmman te pawh siam a ni dawn a ni.
Thutkhawmah hian SYS Commissioner & Secretary K. Lalthawmmawia, MSSC Secretary Henry C. Lalrawnkima, department officer te, Mizoram Athletics Association leh A-City Run Club hruaitute an tel bawk.