Aizawl: Election Commission of India (ECI) chuan electoral roll-a hming la chuang lo leh hming paih palh (left-out electors) te electoral roll-a an luh leh ngei theih nan ‘Special Drive’ neih turin Chief Electoral Officers (CEOs), District Election Officers (DEOs) leh Electoral Registration Officers (EROs) te a hriattir a. Mizoramah pawh he Special Drive hi October 8, 2026 atangin neih tan a ni dawn.
Special Intensive Revision (SIR) hun chhung khan Booth Level Officers (BLOs) te chuan absent, shifted, dead leh duplicate (ASDD), heng vote nei tawh lo, hmun danga insawn te seng luh nan ruahmanna an lo siam tawh a. Heng hming tarlanna hi Local Body office, BDO office leh ECI website ah te a pholan bakah political party te hnenah sem a ni bawk.
ERO ten claims leh objections an chingfel hnuah draft leh final electoral roll hi tihchhuah a lo ni tawh a ni.
ECI chuan voter enrolment hi kalpui chhunzawm zel a nih avangin, la in-enrol lo emaw, hming paih tawhte pawhin hemi hun chhung hian Form 6 hmangin in-register leh tura an dil theih thu an tar lang.
Special Drive chhunga BLO te chuan SIR hmaa electoral roll leh tuna mi chu khaikhawmin, in tin tlawhin chawlhkar khat chhungin mi 20-25 te chanchin enfiahin thla khat chhung he hna hi an thawh zawh a ngai dawn a ni. In tlawhnaah hian vote nei thar leh tling tawhte pawh enrolment an neih sak nghal bawk ang.
BLO ten field verification an tih zawhah BLA te leh ERO te hnenah an list an theh luh ang a, Representation of the People Act, 1950 leh Registration of Electors Rules, 1960 hnuaiah hma an lo la ve leh ang a, thutlukna siam chu zawhah booth-wise list hi political party te hnenah hlan leh a ni ang a, in-enrol theilote tan a remchan angin Booth Level Camp-te pawh buatsaih a ni dawn a ni.