India eptu pawlte chuan Ningani khan a ni thumna atan kawngzawh an huaihawt a, Congress party hruaitute laka police-te chet dan chu an duh lohna lantirin voter list ennawn chungchanga rinhlelhawm thil avangin chief election commissioner (CEC) chu bâng turin an phut bawk.
Eptu party-te, an student unit-te leh thalai rual, Cockroach Janta Party (CJP) te chuan CEC Gyanesh Kumar-a bân nawrin ni tin deuhthaw kawng an zawh a. Prime Minister Narendra Modi-a kaihhruai rorel lai, BJP chu voter list ennawn chu an duh zawnga kalpuia an hlawkpui theih tura tidanglamah an puh a, hemi atan hian Election Commission of India (ECI)-a member ruat dan pawh an duh dana tiin an sawi a, heng ruat zingah hian Kumar-a pawh a tel.
Kumar-a hian engmah a sawi lo va; mahse, ECI leh BJP chuan an puhna hi an hnial thung.
Nawrh huaihawt hian Modi tan a term thumna laihawl velah politic-a chona thar a siam a, exam zawhna put avangin a education minister chu a bân a ngai tawh a, CJP kaihhruaina hnuaia minister bân tura nawrna a awm hnu thla tam a la liam lovah CEC ban phutna a awm leh ta a ni.
News agency ANI-in video a tihchhuahah chuan Congress thlawptu mi tam takin Ninganni khan chhim lama Telangana-ah nawrh an huaihawt a, eptu pawl dang, Rashtriya Janata Dal chuan Bihar hmar lamah pawh hetiang chiah hian nawrh huaihawt bawk.
Tech hub Bengaluru-ah pawh CJP thalai pawl thlawptu za tam takin nawrh an huaihawt a, an zinga tam tak chuan ‘Hming chuang zawng zawng a pawimawh, vote tin hi a pawimawh’ tih leh ‘Mipui rorelna tihhlum hi titawp rawh’ tih poster an keng hlawm.
Nilaini khan Congress chuan police-te chu New Delhi-a Jantar Mantar nawrh huaihawtna hmun thlen an tum laiin party hruaitu, Rahul Gandhi, a farnu Priyanka Vadra leh MP dangte chu hun rei lote chhung hren turin ‘tharum tchuak tak’ hmanga an chunga ti-ah an puh.
Delhi Police-te chuan he puhna hi chu a dik lo va, an sipaite hmingchhiatna atana hman a nih thu an sawi.
“A hmunah kan awm a, officer kan nih angin dan anga tih tur chi hrang hrang zawm a nih theih nan leh dan bawhchhiatna, a tul lo taka thil tih a nih loh nan kan enkawl bawk a ni,” tiin police officer pakhat, Shrishti Pandey-a chuan ANI a hrilh.
BJP thupuangtu, Gaurav Bhatia-a chuan he puhna hi tanchhan nei lo, eptu uchuak tak takte siam niin a sawi a. Heng thusawi hian ‘tanchhan a nei lo a, finfiahna pawh a nei lo’ tiin Ningani khan thuthar thehdarhtute a hrilh.