Zaithiam Shakira chuan a fate chu an zin tlem theihna ngaihtuah turin Barcelona court a ngen a, kar liam ta khan a pasal hlui footballer Pique nena an fate chu zin tlem a, Pique zawkin a rawn tlawh tam theihna ngaihtuah turin ngenna hi a siam a ni.
Colombian zaithiam hi Gerard Pique nen an inthen hnuin Miami lamah a khawsa zui a, a pasal erawh Barcelona lama a awm avangin an fate hian khawmualpui hla tak tak an paltlang a ngai a, hei hi naupang nunphung atana tha lo nia sawiin Shakira hian court chu naupangte dinhmun thlir thatsak turin a ngen.
Hla tak tak an zin fo hian an rilru, taksa leh zirna bakah an hriselna thlengin nghawng a nei a, hei vang hian a fate pa (Pique) nena hun an hman hunah Pique zawk hian a fate awmna lam pan se a duh vang a ni tih court hmaah chuan a sawi.
A rawtna ang chuan Pique chu naupang hmu tur leh an bula hun a hman duh apiangin Miami lamah a kal a ngai dawn a, engkim thu delhkilh awmsa tibuai lovin a fate nen hun an la hman ho theih dawn bawk avangin naupangte dinhmun thlir thiampui turin court chu a ngen bawk.
Kum 49 mi Shakira leh kum 39 mi Pique te hi kum 2011 atanga inzui tanin, fapa pahnih – kum 2013 a piang Milan leh kum 2015 a piang Sasha te an nei a, an inkawp chhung hian Barcelona-ah khawsain June 2022 khan an inthen thu hi an puang a ni.
An inthen hnu lawkah kum 2022 tho hian Pique chuan a professional football a chawlhsan thu a puang zui a, a fapate hi an school chawlh apiangin football a la khelhpui thin.
Shakira erawh nasa zawka music lama lut lehin tunah hian global tour neiin Madrid lamah a awm mek a ni.