- K. Hmingthankaia
Eng thil pawh hi ka phak ang tawka ka lo vei ve zawng leh au chhuahpui ka han tum ve thin tawh hi chu ka theih ang anga a tak ngeia fiah hmasak ve hram hram hi ka tum ve deuh thin a. A kaihnawih mimal emaw, pawl emaw, a concern department lam emawte hi ka thiam dan danin ka bel chiang hmasa ve deuh phawt thin a ni. Tin, ka phak tawk tawkin chu thil chanchin pawh chu ka lo zir chiang hmasa ve deuh bawk thin a ni. Mahse, tun tuma ka thil ngaimawh hi chu a awmze lam hawi pawh hi ka hre lo leh lutuka, tunge ka zawh ang? Mizoram sawrkarah hian a changtu deuh departnent te hi an awm em? tih lam vel pawh hi ka hriat lem loh avang hian, tumah zawt kual buai hmasa lem lo hian, mawl takin ti hian han au chhuak ve leh pawp mai ila, a concern deuh department an lo awm emaw, Cable network provider ten emaw, Consumer Union lamin emaw chhan tlaka an lo ngaih tak leh rawn chhang tawh mai rawh se, te ka ti ta vel mai mai a nih hi. Tin, TV Cable network lam vel hi chu helai Mizoram ringawta hriat sen leh lo chinfel vek theih chi pawh hi a nih chiah hmel loh, te pawh chu ka ti ve deuh tho bawk a ni.
Electrict current kan hman tam dan ang zela a bill kan chawi thin ang hian, nakinah chuan TV pawh hi kan en tam dan azir zela pawisa chawi dan tur te pawh hi an la rawn siam chhuak thiam leh mai lo’ng maw, te ka lo ti ve vel mai mai thin a ni. Mahse, chu erawh chu tuna ka thupui ber a ni lo thung.
Tunah chuan mi tam tak chuan TV cable network hi pawt duh tawh lovin, youtub vel en nan chauhte lo hmang tawh pawh chu ni mah se, keini ang duang tan hi chuan TV hi a la hlu em em maia, TV hi kan lo la tuipui ve em em mai si a nih hi. Chuvangin, cable TV kan en dan, kan dawn danah hian duh khawp lohna leh sawisel tur leh zawh duh hi ka ngah khawp mai a ni. Mahse, tunah chuan tlemte chauh sawi tum ila.
Mizoramah hian TV cable network lam leh a provider-te thunun theitu leh control theitu leh concern department hi an awm em? Cable network provider ten mipui hnena service an pek dan tur chungchang hi central lam rule emaw, guidline emaw, helaia Mizorama an zawm tur guidline emaw, rule emaw a awm em? Chutiang chu a lo awm a nih chuan, mipui, consumer-te hnenah hian mipui tana pawimawh zual chin chauh tal hi chu puanzar hi a tha mai lo maw?
State khata Main provider te hian an hnuaia area hrang hranga sub-operator te hna thawh dan tur te, an thawh theih chin, an mawhphurhnate hi an bituk sak ngai em ? An duty dan turte hi fel taka siam a awm em?
Thil dang tam taka mipuite hi consumer kan nih ang bawk hian TV cable network pawttute pawh hi consumer kan ni ve tho em? Consumer kan nih si chuan TV cable network bikah hian consumer rights hi zah a ni ve em? Nge ni, hetia elpui tur an neih loh lutuk avang hian provider leh sub-operator te hi an thu em emin an lal em em zawk? Mipuiin min mamawh tho tih vangin an inthlahdah deuh em? An remchan dan dana min enkawl mai tur an ni em? Consumer-in channel a subscribe ang ang chu electric current a awm a nih phawt chuan 24hrs.a consumer hnena channel an pek chhuah hi an mawhphurhna a ni em?
Electric department-a sub-station hrang hrang leh site office hrang hrangten an area chhung theuhva electric cunsumer ten eng an hmuh that leh that lohte, thil felhlel awm leh awm lohte 24hrs an vil ang hian, TV cable network provider leh sub-operator te hian 24hrs an vil ve tur a ni em? Thil felhlel a awmin mipuite hnenah thil awmzia an hrilh zung zung tur nge, mipui lam complaint a awm hma chu an ngaihsak a ngai lo? Mipuite hian englai pawhin inthlahrung lo takin kan complaint thei em? Mipui complaint hi chawplehchilhin tha takin an chhang tur emaw, an bawhzui nghal tur emaw a ni em? Main office, main provider lam an haw tawh, sunday kan chawl, tih vel hi a thiang em? Mipui zingah complaint ngun deuh emaw, phunchiar deuh an awmin, hmun dang atangin pawt mai rawh, tih theihna dan an nei em?
Main provider te khawl leh hmanruate, sub-operator te khawl leh hmanruate leh a thawktu mihring, man power zawh loh chin consumer tam lutuk te hi a awm thei em? Hetiang vangte hi a ni thei mai lo maw current awm reng chung pawha TV kan en theih loh fo chhan hi. An khawl leh hmaunruate hi update ve fo a ngai em? An lo update ve fo ngei chuan a rinawm viau nachungin, vantlang hriata sawisel ngam leh nawrtu an neih thin loh avang hian an lo inthlahdah deuh a ni thei ang em? Tun aia nasa leh zual te hian tan hi an la la leh thei mai lo maw?
Aw le, TV cable network lam leh IT lam hrim hrim hi chu van sang lam boruak kal tlanga signal hna thawh a nih avang hian, helaia keini lo tih ve mai hleihtheih loh leh, a vang leh chhan pawh kan lo la hriat ve mai loh thil hi chu a tam em em ang tih hi chu a hriat mai a ni. Mahse, khawimawlai hmunpui lam atangte emawa thil tih dan an rawn tih danglam chang te hi chuan, thil awmze dik tak te hi chu a theih chin chin hi chu mipui hnena puanzar thin te hi chu ni thei ta sela. TV kan en theih loh chhan emaw, channel thenkhat en theih loh chhan emaw, helai atangin emaw, phailam atangin emaw channel an rawn tih danglam chhan emawte hi mipui hnenah hian rang taka puanzar thin te hi ni thei ta se, te ka lo ti ve deuh thin a ni. Free channel ho hi chu thu hran ni se, a bik takin pay channel ho hi ka tihna a nih chu.
A bik takin mi thenkhatin darkartina en ngei ngei kan duh thin pay channel ho, news leh sport channel ho kan subscribe ngeite pawh hi a then an bo hlen daih a, a chhan engmah lah chu kan hre ngai bawk si lo. Kan fee chawi lah chu a ngai reng tho bawk si. Tin, news channel ho leh sport channel ho, man to bik ho lah hi a ruala a vaia that chang hi a tlem em em mai bawk si, an inchhiat chhawk deuh reng mai bawk thin si a. Hengte pawh hi helaia khawimawlai khawl zawh loh vang mai mai a nih duh thin hmel te ka lo ti deuh thin a ni. Operator hnena zawh sek lah hi a inthlahrunawm ve deuh bawk nen, lung ni lo teuh chung hian kan awm vel ta mai mai thin a nih hi. Tin, khawl lamin a zo lo tih lam phei hi chu min hrilh duh pawh ka ring chiah lo bawk a ni.
Aw le, kei hi chuan mite sawi duh loh thu ho te te, ka rilrua awm ang ang hi pehhel pawh awm chuang lo hian mawl angreng tak hian ka lo sawi ve leh phawng phawng mai thin a. Cable network kaltlanga TV kan lo pawh ve dante, a kal hmang leh provider leh sub-operator te kal hmangte, a dan leh dun lam te pawh hi engmah ka hriat ve loh lutuk avangin khiti khian zawhna leh duhthute ka han sam ve leh ta chiam mai a ni a. Mahse, heng ka thu sawite avanga tan lakna tur leh hmasawnna turte a lo awm a nih chuan a tha lam a ni ang chu.
Tin, cable network kaltlanga mipuiin TV kan en dan tih danglam emaw, tih dan thar siam emaw, heti lam chungchang hrim hrim hi chu phailam thu thu emaw, parliament dan siam ngaite emaw a awm ngei ang a. Tin, technology company lam emaw, IT Ministry leh I&B Ministry lam thu leh hla azir a ni ngei ang a. Chutianga thil tih dan tur tha leh rawtnate kan nei a nih chuan, kan MP te kaltlangin emaw, state dang MP te kaltlangin emaw pawha thil tih chi tur chu niawm tak a ni e.
Chuti ni mah se, tun dinhmuna helaia kan lo tih ve theih chin chinah hi chuan, mipui, customer te hmakhua ngaiin lo in-update ve zel thin te hi i tum zel ang u aw.