Israeli-ten university campus tela Gaza hmun hrang hrang an beihnaah Palestinian pasarih vel an thi.
Van sang atanga Pathiannia Islamic University campus beihnaah security guard pathum an thi a, zirna in hi darkar rei lo te hnuah kah nawn leh a ni bawk.
Drone hmanga campus beihna hmasa zawkah hian thil puak per velah hmeichhe zirlai panga an hliam a. Pakhat na deuh hlek awmin a bul hnai damdawi in siam chawpah hruai a ni.
Laipui hmanga Gaza chhim lam, Khan Younis-a al-Mawasi-a Nasser Medical Complex beihnaah mi pahnih an thi a, naupang telin mi dang tam takin hliam an tuar bawk.
Gaza laili, Deir el-Balah khawchhak lama Israeli drone hmanga beihnaah mi pakhat a thi a, mi dang tam takin hliam an tuar a. Hmar lam, al-Rashid Street-a Hamad Hospital damdawi in bul beihnaah mi pakhat a thi bawk tih Palestinian Wafa news agency-in a tar lang.
Popular Resistance Committees in Palestine chuan university hmun beihna an dem thu sawiin palai leh ram dangte chu Israeli-in dan an bawhchhe nasa lutuk titawp tura hma la turin an ngen.
United Nations Educational, Scientific & Cultural Organization (UNESCO) chhinchhiah danin Gaza-a zirna in sang 95% dawn chu Israel-in October, 2023 atanga a beih hnuah a chhe tawh.
Pathiannia beih, Islamic University pawh hi a building chu a chhe sa deuh vek tawh a, building pahnih chiah ding a awm tawh a ni.
Gaza-a Palestinian health ministry-in a chhinchhiahna thar berah chuan October, 2025-a inkahhai a awm atangin mi 1,551 vel thah an ni tawh a, mi 5,573-in hliam an tuar.
Israel-in Gaza Strip a beih atanga thi chu mi 74,544 an tling tawh a, mi 1,75,692 velin hliam an tuar bawk.
Israel hian Strip chhungah hian ram a luah belh zel bawk a, Gaza hmun thuma thena hmun hnih dawn chu Israeli sipaite thunun emaw, an khuahkhirhna hnuaia awm a ni mek.
Palestinian tam tak chuan Israel-in an inkalpawhna ber a khar avanga puihna lut a tlem avangin ei tur an tlachham hle a, puihna sum an hmuh thin a tlem bawk avangin harsa takin an khawsa mek a ni.