Aizawl: Chief Minister Lalduhoma’n thangthar rilru thianghlimte rilru hruaikawi zawnga thu dik lo leh dawt sawi a ching hi sim turin MNF Vice President Lalchamliana chuan Thawhtanni chawhmaa MNF Hnam Run-a inkhawm neihah a sawi.
Lalchamliana chuan chief minister-in opposition a nih lai leh ruling CM a nih hnu thleng pawha Assembly House zahawm tak chhung ngei thlenga thudik lo sawi a ching chu pawi a tih thu sawiin, zalenna sual chungchang leh Mizo Peace Accord ziah chungchanga ZPM hruaitute thusawi hrang hrangte chu dawt a nih thu leh Mizo mipui te, India sorkar leh MNF-te intawhkhawmna hmanga inremna ziah a nih zawk thu a sawi.
Val Upa Council (VUC) member pawimawh, Bualhranga bân chhan sawiin Lalchamliana chuan, chief minister mipat hmeichhiatna leh corruption lam thila a hming sawi a kai chu chhui chhuah tlak a nih rualin, lal mizia leh nungchangin khua leh tuite a hluah thin angin CM zia leh nungchang hi thangtharten an rawn chhawm zel mai ang tih a hlauhawm hle tih a sawi bawk.
ZPM sorkar chu central sorkar thu hnial ngam lova danin thuneihna a pekte humhim ngam loah a puh a. MNF chu ram leh hnam tana martar leh tuar ngam, Kristian leh Mizo nunzia pu a mahni inhaivur lo pawl a nih thu sawiin, spirit of 1966 nei thara MNF-a haw khawm leh vek turin mipui a sawm a ni.