- Rev. Dr. Zaichhawna Hlawndo
Zofate kan nihna leh kan inpumkhatna: Zofate hian hun kal tawhah hnam hming hrang hrang kan lo pu a. Chin, Kuki, Lushai, Mizo, Zomi, Lai, Hmar leh hnam hming dang tam tak kan nei. Heng hming hrang hrangte avang hian kan inthen darh a, kan thlahtu bul leh kan nihna dik tak pawh kan theihnghilh mêk a ni.
Kan thlahtu hming chu ZO a ni a, Zo, Dzo, Jo, Yo leh Zou tia sawi a ni thin. Chuvangin kan zavaia kan nihna huapzo chu ZOFATE a ni. Kan tawng, kan hnam nunphung, kan sakhua leh kan khawsak dan a inang vek lo mai thei. Mahse, heng kan danglamnate hian min then lovin, kan hnam hausakna leh chakna a ni zawk tur a ni.
Thing pakhat hian zar tam tak a nei thei a, mahse a zung chu pakhat a ni. Chutiang bawkin Zofate pawh hnam hrang hrang angin lang mah ila, kan zung, kan nihna leh kan thlahtu bul chu pakhat a ni.
Ramri hrang hrangah awm mah ila, hnam khat kan ni. Tun dinhmunah Zofate chu India, Myanmar, Bangladesh leh khawvel ram hrang hrangah kan awm darh a. Ramri leh ram rorelna avangin kan inthen darh rih a ni. Amaherawhchu kan unau nihna hi ramriin a sut chah mai mai theih a ni lo.
Tuna kan chenna ram dan leh thuneihna kan zah tur a ni. Mahse, leilung ramri siamchawp hian min then hrang rih a ni thei e, kan thinlung leh unau kan nihna erawh a then ngai lovang. Pathianin kan chenna atan min pek ram hi kan ram a ni a, Zofate awmna apiang chu Zoram a ni.
Pathian kohna – Zofate kulh chim dinthar lehna : March 12, 2012 khan Pathianin ka pianna ramah kir leh turin min ko a. Nehemia chu Jerusalem kulh chim dinthar tura a tirh ang khan, Zofate hnam kulh chim dinthar turin min tir a ni. Kum 2016 atanga 2026 thleng hian Zofate hnam dinthar lehna atan kum sawm chhung kan lo thawk vebtawh a ni.Lal Isuan Johana 17:21-ah, “An zain pumkhat an nih theih nan” tiin a tawngtai a. Sam 133:1-ah pawh unaute inpumkhat taka an awm ho chu a that thu kan hmu.He inpumkhatna hi Pathian vision a nih tlat avangin kan ngaipawimawhin kan ngaihlu tur a ni.
Zofate Kristian kan nihna chu kohhran chhungah chauh ni lovin, kan hnam leh khawtlang nunah pawh a lang tur a ni. Pathian thu kan hril laiin hnam inhuatna kan nei reng a nih chuan kan Kristian nihna hian a tum a thleng lo tihna a ni. Pawl (denomination) in min then darh a nih chuan Kristianna leh hnamah kan chiang lo tihna a ni ang. Zofate inpumkhatna hi Pathian ropuina leh a Lalram zauh zelna atan a ni tur a ni.
Hun kal tawha hliamte tihdam a pawimawh: Kan hnam chanchinah inremlohna, indona, politics avanga inthenna leh hnam hming avanga inhnialna tam tak a lo awm tawh a. Hengte hi kan theihnghilh mai thei lo. Mahse, kan thlahte kal zelte hnenah inhuatna leh inremlohna kan rochuntir zel tur a ni lo. Tun hi Zofate tan hnam zar peng inkara inhuatna tihbo a, inremna leh inpumkhatna dinthar hun a ni. Kan lo in hliamte tawhna te tihdam a, kan kulh chimte dinthar leh turin kan tanrual a hun tak zet a ni.
Chhuantharte tana kan mawhphurhna hlen a ngai: Khawvel ram hrang hranga Zofate chhuantharte hian an thlahtu bul, an tawng, an hnam nunphung leh an chanchin an hriat a pawimawh hle. Kan hnam chanchin kan ziah chhuah a, kan pi leh pute thawnthu kan vawn nun a, kan tawng leh hnam nunphung kan humhalh tur a ni.
Kohhran, zirna lama mithiamte, hnam pawl hrang hrang leh thalaite hian kan hnam inpumkhatna atan kan tanrual a ngai. Tunah hian technology avangin khawvel hmun hrang hranga Zofate inbiak pawh a awlsam tawh. He remchanna hi inhuatna thehdarhna atan ni lovin, inpumkhatna leh inthianthatna atan kan hmang tur a ni.
Hnam peng hrang ngaihtuahna leh tundin tumna atangin hnam pum ngaihtuahna leh dinchhuahna tura kan harh a ngai: Zofate hian kan hnam chhunga peng hmingte kan in zahsak zel tur a ni. Mizo inti chuan Mizo ni a a hriat te , Hmar, Lai, Paite, Thadou, Chin, Kuki leh hnam peng dangte pawhin an nihna anga an lo in hriat kha kan in zahsak vek tur a ni. Mahse, heng kan nihna peng hrang hrangte khailhawmtu, kan zavaia kan nihna dik tak leh a kungpui ZOFATE hi chu kan pawm tlan vek tawh a ni tih kan hriat a ngai.
“Eng hnam peng nge i nih?” tih aiin “Ka unau i ni” tih rilru kan pu tur a ni. Kan hnam leh kohhran hrang hrangte hian zirna, hnam nunphung humhalhna, khawtlang hmasawnna, retheite tanpuina leh remna siam kawngah kan tangrual tur a ni. Inpumkhatna chu inkhawmpui neihna leh thu mawi sawi mai ni lovin, kan nitin nunah a taka kan lantir tur a ni.
Zofate hnam thar dinthar lehna: Tun hi Zofate tan hun pawimawh tak a ni. Kan hnam chanchin thar kan ziak dawn em, nge kan inthen darhna hlui kan chhunzawm zel dawn? Kan hnam hming hrang hrang anga kan lo hriat tawh avangin kan inhaw tur a ni lo. Hnam dangten ramri hrang hrang min siam sak avangin kan unau nihna kan theihnghilh tur a ni lo. Kan tawng, kan hnam nunphung leh kan ro hlu kan humhalh ang a, kan thlah kal zelte tan kan hnutchhiah tur chu thlahtu bul pakhat, nihna pakhat, hnam pakhata kan nihna hming chu ZOFATE a ni tih hi a ni. Tudang kan nilo kan pu Zova thlah ZOFATE vek kan ni.