Aizawl: Home Minister K Sapdanga chuan ruihhlo do chu sorkar rilru luahtu ber a nih thu leh Operation Trident hmanga ruihhlo tawlhtu liante an man chhunzawm mek zel thu sawiin, he hmalakna hi tawpsan mai lovin an hnuk chhut chah a nih thlengin umzui zel an tum thu a sawi.
He thu hi ZPM Thalai hruaituten Nilaini khan a pisa-ah a department chana hlawhtlinna hrang hrang, a bikin dan lova thil tawlhruk kawnga a hmalakna avangin lawmthu hrilha an kawmnaah home minister hian a sawi.
Home minister chuan ruihhlo do chu a hautak avangin police leh excise ringawt tan hneh chi a nih loh thu sawiin, tlawmngai pawlte tangkaina leh Mizoram Police-te rinawmna chu chhuanawm a tih thu a sawi a. “Operation Trident hi Central agency-te bultum ni mah se Mizoram Police-te an tangkai hle a, hmun 38-a operation nei tura thuruk an thup thei leh rinawm tak leh fel taka hma an lak avangin central lam pawhin Mizoram Police-te an fak hle. Kan police-ten an hman civil mi-ah pawh rinawm lo an awm lo,” a ti.
Ruihhlo tawlhtu liante chhut chah chu tawpsan mai an tum loh thu sawiin Home Minister chuan, he hmalakna avang hian thalai nunna tam tak chhan a nih dawn bakah chhungkaw buaina tam tak a reh phah dawn a. A hlawkna chu state dangte pawhin an tel dawn bakah, Mizoramin a tel nasa ber dawn tih sawiin, Mizorama tlawmngai pawl leh mipuite chu sorkar tanpui chhunzawm zel turin a sawm a. Ruihhlo do chu politics-ah an thatpui ang em tih lam ngaihtuah lo vin, ram tana tha tur an ngaihtuah ber thu a sawi.
He hunah hian ZPM Thalai President Jeje Lalpekhlua, MLA pawhin thu sawiin, tun hma atanga dan lova thil tawlhruk hluar lutuk thin thalaiten an lo vei thin chu tun sorkar hnuaiah chief minister Lalduhoma leh Home Minister K Sapdanga te thawhrimna zarah a kiam chak hle a an hriat thu a sawi a. Mizoram Police leh central agency-te tang dunin ruihhlo tawlhtu liante an man chho ta zel mai chu lawmawm an tih thu leh home minister hmalakna hrang hrang avanga lawmthu an thlen thu a sawi bawk.