Mizorama TV show lar ber pakhat Comedian Search an ti mek a, an zo fel hnai. Zan khat chiah a awm tawh a, October ni 31 zanah an zo dawn.
Kar liamta Nilaini zan khan round lina an nei a, chumi paltlangtute chuan Inrinni liamta zan khan an inel leh. Inrinni zana inelte hi October ni 31 zanah an inel leh dawn a, hei hi Grand Finale tur niin, result puanin a chhunzawm ang.
September ni 30-ah selection round an ti a, October ni 2 leh ni 3 zanahte first round, October ni 7 leh ni 8 zanah second round, October ni 15 leh ni 17 zanah third round an ti.
2008-ah Comedian Search hi a vawi khat nan an buatsaih a, Covid-19 vanga 2020-a an chawlh bak kha chu kum tin an la nei thei. Ngaihhlut a hlawh a, a vawi khatna atang khan mipuiin an ngaina nghal a, kum tinin entu an thahnem thin.
Tun tumah hian host Hruaitei leh co host Sanga (Pu Thangthuama) te’n an kaihruai a, H Rotluanga (Mapuia), Darrokima leh Lalhruaitluanga Chawngte te’n an endik a ni. Guest judge an nei thin a, an guest judge-te’n lawm an hlawh hlawm a, show tihlutu pawh a tling awm e.
Chief organiser Mapuia chuan tun tuma inelte hi an intluktlang tih a sawi a, “Kan contestant-te an intluktlang a, endik pawh a har khawp mai. Han chhe fal emaw han tha fal emaw an awm lo tiin a sawi theih ang,” a ti.
“Comedian Search hi a upa telh telh a, contestant-te an intluktlang telh telh niin kan hria a. Eng emaw lai atang khan han chhe fal emaw han tha fal emaw hi an awm ta lo a, an inel tawk em em zel a,” a ti bawk.
Comedian Search-a tel thang an awm a, mipuiin thiam an tih sa, a hmaa lo tel tawh thin an awm a, a then phei chu tel zing tawh tak takte pawh an ni. Chutih rual chuan tel thar, tha tak tak an awm bawk a, inlan hmasak bera hriat hlawh nghal te pawh an awm. Amaherawhchu, third round thleng kha chuan mipuiin pakhatna ni tura an rin rawn thup erawh an awm rih lo niin a lang a, round tinah inelna a sang ti pawhin a sawi theih awm e.