Johny Lallawmkima’n Mizo inchai pate title a chuh vawi khatnaah a champion nghal a. Nulaihawlah champion lai, Elizabeth Rohlupuii’n a vawi hnih nan title a humhim ve thung.
MBOCWWB Rahbi Chhertu Mizo Inchai Title Fight 2026 chu Nilaini zan khan LPS Arena, Falkland, Aizawlah tan niin a zan khatnaah title fight pahnih leh freestyle wrestling (exhibition) match pali a awm.
Pate-ah Lalchhanhima kalsan title inchuhin Saitual inchak chak ve ve an innuai a, thawh 10 an inbeih chhungin kg kuaa rit zawk, Johny-a’n tharum leh thahrui a nei zawk tih a lantir a, title a chuh vawi khatnaah a champion nghal.
A tir atangin a nawrtu zawkah kum 27 mi a tang a, thawh lina thlengin amah aia kum hniha naupang lakah Awmpuia a inveng thei na a, thawh nganaah a bawkkhup zawngin Johny-a’n vawi 10 chhiar thleng a bawhbet.
A hnuah inbawhbet awm zui mah se Johny-a’n thawh rukna leh thawh 10-naah vawi khat ve ve nawr chhuakin point hnih a hmuh belh bawk.
Kum 2022 champion Awmpuia’n kum hnih kal ta khan Chhanhima lakah title a hloh va, lak kir leh tum mah se thawh 10 an inchai chhungin Johny-a lakah point khat mah a hmu lo va, a tuan rang zawk mah se tharum leh thahruiah a el zo lo.
Champion thar hian kawnghren bakah Rs 50,000 a dawng a, Awmpuia’n Rs 30,000 a la a ni.
Nulaihawlah kum 23 mi, Elizabeth-i’n a vawi hnih nan title a humhim a, thawh nga an inchai chhungin Kolasib tleirawl, Ruthi Lalhruaitluangi’n a el phak lo a, hneh takin a thunun tluan.
Thawh tinah vawi 10 chhiar thlengin champion laiin a bawhbet vek a, thawh hnihnaah a zangthal zawnga a bawhbeh hmain a nawr chhuak tel a, point 11 hmuin thawh dang zawngah point 10 vek a hui a ni.
Title Fight-a a inlan vawi khatnaah kum 17 mi, Ruthi ruh a la no deuh a, thawh thumna an zawh hnuah awmze neiin a bei let tawh lo va. Nawi takin thawh hnuhnung pahnihah a inlan a, tlawm sa leh awlsam taka bawhbeh mai theihin a che a, mualphothlak takin hun tawp a hmang.
Kum 2022 atanga champion, Elizabeth-i’n Rs 50,000 dawngin kg 67-a rit a ni a, kg 70 chung lam inelna, Nulian title chuh a tum tih a sawi lawk a, a tihlawhtling dawn em tih erawh a hriat lo va. Title a chuh phak avangin Hruaii’n Rs 30,000 a dawng a ni.
MBOCWWB Rahbi Chhertu Mizo Inchai Title Fight 2026
Zan 1-na : Oct. 28, 2026 @ LPS Arena
RESULT
MIZO INCHAI TITLE FIGHT : PATE
Johny Lallawmkima (Saitual) def B Lalawmpuia (Saitual) – 12-0
MIZO INCHAI TITLE FIGHT : NULAIHAWL
Elizabeth Rohlupuii (Bawngkawn West/Melriat, title holder) def Ruthi Lalhruaitluangi (Kolasib Saidan) – 51-0
FREESTYLE WRESTLING (EXHIBITION)
Kg -45: Johny Lalruatsanga (Mamit) def Lalduhawma (Kolasib) – Technical Superiority (Chungnung takin a chak)
Kg -55: Rohit Halder (Aizawl) def Lalmuansanga (Kawnpui) – By Fall (Chungnung takin a chak)
Kg -45: Emily Lalliansangi (East Lungdar) def Nancy Lalremruati (Mamit) – By Fall (Chungnung takin a chak)
Kg -65: Samuel VL Hmangaihzuala (Thenzawl) def Franky Ramthanpuia (Mamit) – By Fall (Chungnung takin a chak)
Zan 3-na : Oct. 30, 2026 (Ningani) – 8:00 PM @ LPS Arena, Falkland
FIXTURE
FREESTYLE WRESTLING (EXHIBITION)
Kg -50 : Lalngaihsangi (Kolasib) v Maria VL Malsawmtluangi (Mamit)
Kg -70 : Zothankima (Serchhip) v J Lalrinkima (Aizawl)
MIZO INCHAI TITLE FIGHT (NULIAN)
Lalhmangaihsangi (Saichal/Zemabawk West, title holder) v Zodinpuii (Ramthar Lunglei)
FREESTYLE WRESTLING (EXHIBITION)
Kg +85 : Lalthlengliana (Aizawl) v R Lalrinchhana (Serchhip)
Kg -75 : Zothansanga (Serchhip) v C Lalawmpuia, Aizawl
MIZO INCHAI TITLE FIGHT (palian)
Lalsangliana (Upper Republic/Excise Deptt, title holder) v Lalremtluanga Chhangte (Zobawk Lunglei)