Aizawl: Central Vigilance Commission thuchhuah zulzuiin Mizoram sorkar chuan October 26 atanga November 2, 2026 chhung hian ‘Vigilance Awareness Week 2026’ a hmang mek a, he hmalakna puala Vigilance Department-in Vana Pa Hall kawt atanga Millenium Centre thlenga Walkathon a huaihawt chu Inrinni zing dar 7 khan Chief Secretary Khilli Ram Meena, IAS chuan a vai liam.
Walkathon neihnaah Chief Secretary chuan eirukna do chu mi tin mawhphurhna a nih angin eirukna tel lo society siam turin mahni zawn theuhah tan la turin sorkar hnathawkte a chah a; Secretary Dr YLN Reddy, IAS pawhin fuihna thuchah a sawi bawk.
He hunah hian Commissioner & Secretary, Secretary, Special Secretary leh official pawimawh hrang hrangte, Vigilance leh ACB thawktute bakah St. Paul’s HSS zirtirtu leh zirlai an tel a, eiruk dona thu hrang hrang hmanga au rualin thuziak keng chungin kawng an zawh a, Millenium Centre kawtah Additional Secretary V. Lalengmawia, MCS chuan lawmthu sawiin he hun hi a khar a ni.
Vigilance Awareness Week pual hian October 28, 2026 khan Vana Pa Hall-ah ‘Workshop on Observance of Vigilance Awareness Week 2026’ chu Chief Minister Lalduhoma khual lianna hnuaiah hun hnih a thenin hman a lo ni tawh bawk.
Hun khatnaah hian ACB SP Lalbiakkila kaihhruaina hnuaiah rinawmna thuthiam sawi rual a ni a, hun hnihnaah Govt Aizawl College zirlaiten eirukna tirem tura sorkar hnathawkte pawimawhna chungchang hmangin debate an nei a, hemi hnu hian Power Point presentation-in entirin flyer leh debate intihsiakna lawmman sem nghal niin Joint Secretary V Zaithanmawia chuan lawmthu sawiin hun a lo khar tawh a ni.