Aizawl: Mizoram Wrestling Association buatsaih Mizo Inchai Title Fight chu Chief Minister Lalduhoma chuan LPS Arena-ah Zirtawpni zan khan telpuiin, Mizo inchai chu Mizo hnam infiamna chhawm nung zui zela Olympic thleng phak infiammite entawn tlak tura chher chhuah nana puih tum a nih thu a sawi.
Chief minister chuan Mizote hi mi chak ngaisang hnam an nih angin inchai pawh he an hnam nunphung leh hnamzia humhimna atan zirlaia hmangin ngaihsak zual a tul thu sawiin, Sumo wrestling leh Muaythai te pawh hnam dangten an chhawm nung reng bawk si a, he infiamna hi Mizo infiamna zinga Olympic item awm chhun a nih hial thu a sawi.
Sorkarin Olympic 2036 thlir chunga infiamna lama hma a lak chhoh mek piah lamah, Mizoram Wrestling Association-in an dil angin inchaia zirna chhuat phah (Practise Mat) leh intihsiakna chhuat phah (Wrestling Mat)-te sorkar atanga pek a tum thu a sawi bawk.
He huna title fight hrang hrang neihnaah Freestyle Wrestling Exhibition Match pali a awm a, Nulian Title Fight-ah Lalhmangaihsangi (Saichal/Zemabawk) chuan Zodinpuii (Ramthar, Lunglei) hnehin title a humhim a, Palian Title Fight-ah pawh title hum mektu Lalsangliana (Upper Republic) chuan Lalremtluanga Chhangte, (Zobawk, Lunglei) hnehin a title a humhim a ni.