India leh Myanmar inkara ruihhlo tawlhrukna leh hawala sum inzawmna chhui meknaah Enforcement Directorate (ED) chuan mi pali an man belh leh a, tun thlengin mi 10 man tawh niin he sumdawnnaa inrawlh nia rinhlelh bank account 991 zet chu an hrek (freeze) tawh bawk.
Thulaknain a tar lan danin ED Aizawl Sub-Zonal Office chuan Prevention of Money Laundering Act (PMLA) hnuaiah heng mi pali — Lalrammuana, Thangcintuang (Chintuang), Jabrul Haque leh Abu Saleh Md Saif Uddin-te hi Aizawl Central Jail-a NCB thubuai hnuaiah an man thar leh a, ED chuan darkar 46 chhung an kawl a ni.
He chhui meknaah hian cheng nuai tam tak inthawnkual niin, Myanmar-a ruihhlo tawlhtu lian atanga Mizorama buaipuitute, leh Assam leh ram chhung hmun hrang hranga sum buaipuitute thlengin an inzawm tlat niin rinhlelh an ni a. He network-ah hian Abu Saleh Md Saif Uddin-a account pakhat chauh pawhin Rs vbc 11.44 zet a khawih a, chumi zinga Rs vbc 6.67 chu cash-a chhun luh niin Champhai lam hawala account-ah thawn a ni a; Churachandpur-a in pakhat dapnaah Myanmar Kyat vbc 43 in-transfer-na leh Myanmar-a tualchhung mobile hmanga pawisa inthawnna (payment platform) hman thin leh ram dang pawisa inthleng (foreign currency exchange) theihna KPay transactional record-te thlengin an hmu chhuak bawk a ni.
ED chuan ruihhlo man hi ramri kana a taka pawisa inthawn mai lovin India rama ruihhlo hralhna sum hmangin sumdawnna thil, damdawi, chawhmeh leh petrol te leiin Myanmar lamah an thawn a, hetiang hian an kalpui niin an ringhlel bawk.
Agency-te chuan Taniang-a enkawl nia rinhlelh, mini-ATM counter ‘M/s Go Alpha Trip’ chu Rs vbc 175 zet an inthawnna kawngpui pakhat atana hman an hmu chhuak a. West Bengal, Mizoram leh Delhi-a thil supplier inhnamhnawihna transaction-te pawh chhui zui mek a ni bawk.