Aizawl: Lunglei Municipal Council (LMC) Vice Chairman K. Lalrinawma chuan Thawhtanni tlai dar 3 khan party hruaitute nena an sawiho hnuah LMC Chairman Lalzuithanga hnenah banna a thehlut.
BoC Conference Hall-a banna thehluh puala inkhawm tawiah K. Lalrinawma chuan boruak tha tak hnuaia he thutlukna hi siam a nih thu sawiin, Vice Chairman a nih chhunga chairman, thawktute, local council, NGO, zirlai pawl, MJA, lirthei neitute pawl hrang hrang leh sorkar department hrang hrang nena thawhhona tha an nei thin leh Pathian kaihhruaina avanga thuneihna hmangsual lo leh sum chheprel emaw a neih loh avangte leh a phak tawka tihsual lian lutuk a neih loh avangtein lawmawm a tih thu a sawi.
ZPM Southern Hqrs President Lalramliana, MLA pawhin thu sawiin, tun hnaia party an insingsak kal zelah party lama mawhphurhna lian zawk hlen chhuak tura party hotute beisei anga he thutlukna hi siam a nih thu a sawi bawk.
LMC Vice Chairman a nihna atanga a bansan tak avang hian a aiawhtu tur Vice Chairman thar chu Chairman leh Party hotute’n an la sawiho leh dawn a ni.
Chanchinbumi te zawhna chhangin Vice Chairman thar tur chu LMC Chairman leh party hotuten an la sawiho turah a ngaih thu K Lalrinawma hian a sawi.