Delhi-ah kum tin danin thlasik lo thleng turah boruak bawlhhlawh a intan leh mek a, khuahkhirhna pawh kalpui leh tan a ni.
India khawpui bera boruak thianghlim dan dinhmun, air quality index (AQI), PM2.5 tia sawi chu 300 a kai a, hei hi ‘tha lo tak’ huanga mi niin mi cheng maktaduai tel tana hriselna khawih thei a ni.
Hetiang boruak rei tak hip hian thawk lamah harsana a thlen thei a, damlohna a thlen a, naupang leh upa tan a hlauhawm zual.
Thuneitute chuan inkhuahkhirhna, Graded Response Action Plan (GRAP)-a Stage II an hmang tan a, hei hi vaivut, lirthei khu leh boruak tibawlhhlawh thei dang thununna a ni.
GRAP hi boruak a bawlhhlawh nasat dan indawta stage hrang hrang nei a ni a. Stage II-ah hian kawngpui uluk zawka tihfai te, mi mal lirthei tlanchhuak a tlem theih nana lirthei hun man sang lak te pawh a tel a. Delhi Metro chuan ni tin rel vei tur 20 dang a tihbelh a, sorkar pisa kai hun pawh tihdanglam a ni.
Thuneitute chuan khuahkhirhna hi ni lo awm zel turah boruak a bawlhhlawh zui dawn nia hmuh lawk vang a ni tih an sawi.
Delhi leh a chhehvel India hmar lamah hian thlasik apiangin boruak a bawlhhlawh em em ziah a, a bikin India-a kûtpui ber, Diwali hun laiin a nasa zual thin a, he hun a thleng tep.
Kût hi êng, bati leh laltin leh hal mawi nena lawm thin a ni a. Halmawi hal hian boruak a tibawlhhlawh zual nasa thin em em bawk.
Kum tin boruak bawlhhlawh thin hi a chhan tam tam zingah lirthei khu, thil siamna hmun atanga khu chhuak, khaw vawt, thli chak lo leh an thenawm state-a lo hal te pawh a tel.
October thlaah pawh khan Delhi boruak hi a bawlhhlawh tan tawh a, kum riat chhunga hemi thla bika AQI chawhrual a san ber tum a ni.
Mi thiamte chuan khua vawt thut bakah thli chak lo leh an thenawm, Punjab leh Haryana-a lo neituten an thlai sengna ro an hal khu nasa lutuk chu a bawlhhlawh chhanah an puh.
Tun hnaia ruah sur leh thli chak deuhvin tlemin a tiziaawm a; mahse, hmarthlang atanga thli thawin thenawm atangin lo hal khu a keng lut leh teuh tho a ni.
India-a boruak dinhmun thlithlaitute chuan AQI 301 leh 400 inkar hi ‘chhe tak’ tia sawiin 400 chung chu ‘hlauhawm’ an ti a. Nilaini tuk khan 377 a ni.
Diwali lo thleng turah boruak a bawlhhlawh zual rin a ni a. Nikum khan kût lawm tukah halmawi hal khu nasa lutuk avangin boruak a zing khat vek a ni.
Thuneitute chuan halmawi hi kum tam tak a siam, a hralh leh hman an khap tawh a; mahse, dan kenkawh erawh a hlawhchham deuh zel.
Thawhtanni khan Supreme Court chuan khualrel tana him chi (green firecracker) chu Delhi leh a chhehvelah tiam chin neia siam, hralh leh hman a phal.
Zing dar 06:00 leh dar 07:00 inkar leh zan dar 08:00 leh 10:00 inkarah November 7 leh 8-ah hal a phal a. Damdawi in, sikul leh bengchhan phal lohna bik hmun atanga metre 300 aia hnaia hal a khap bawk.
Green firecracker-te hi bawlhlo siam danglam hmanga siam niin a pangngai aiin boruak a tichhe nep a ni.