Aizawl: Ministry of Tribal Affairs bultuma Art & Culture Department leh Information, Public Relations, Printing & Stationery Department-te tangkawp buatsaih ni thum chhung awh tur ‘Mizoram Tribal Film Festival 2026’ chu Nilaini khan Art & Culture Minister C. Lalsawivunga chuan khuallian niin a hawng.
Khuallian C. Lalsawivunga chuan he film festival hi Mizo hnam ziarang leh ropuina pho chhuahna hun pawimawh tak a nih thu sawiin, film siam chu sum leh tha tam tak senga luhchilh a ngaih avangin film siamtute chu hnam leh culture chawinungtu pawimawh tak an nih thu a sawi.
Hetiang film hmanga Mizo hnam nungpung leh ropuinate zir chiang thar leh tur leh naupang zawkte rilru-a hnam hlutna tuh zel turin kalkhawmte a chah bawk.
Hawnna inkhawm hi Art & Culture Department Secretary Zodingpuii chuan kaihruaiin, Joint Secretary TC Lalkhuma hnen atangin festival buatsaih dan report leh Joint Director F. Lalthanmawia hnen atangin technical report ngaihthlak a ni a, intihsiakna hrang hranga lawmman dawngtute hnenah lawmman hi sem chhunzawm nghal a ni.
Sadawt film chuan short film-ah lawmman pakhatna a dawng a. Reels Making Competition-ah ‘Maurawkela’-in lawmman pakhatna a dawng ve thung.
Mizoram Tribal Film Festival 2026 hi Vana Pa Hall leh Lianchhiari Run Mini Theatre-ah te film leh Mizo movie hrang hrangte en tur a awm dawn a. A tawp ni, November 6 chawhnu hian Tribal Research Institute, Kelsih-ah Film Making Competition-a pakhatna hi chhuah a ni ang.