Aizawl: Vanhnuailiana Group YMA buatsaihna hnuaiah Zokhawthara kohhran hrang hrang committee-te chu Nilaini chawhnu khan inhmukhawmin, Mizo hnam inpumkhatna leh inlungrualna a lo ngheh zel nan kohhran inkhawm leh puipunna hrang hrangah Mizo tawng (common language) a tam thei ang ber hman zel tawh ni se an ti.
Inkawmhona hi Vanhnuailiana Group YMA Rorel Inkhawm Vawi-5-naa Mizo tawng hman uar a nih theih nana hmalak tura thutlukna lo siam tawh bawhzuiin Zokhawthar YMA sub-headquarter bultum an ni a. Zokhawtharah hian kohhran hrang 15 awmin, biak in hrang neia inkhawm hrang (kohhran in dang) 23 zet an awm rualin, an inkawmnaah hian kohhran 19 ai awhtu kohhran committee mi 86 an tel.