Aizawl: Siaha leh Lawngtlai East Bial tlawha zin MPCC vice president, Lawngtlai West bialtu MLA ni bawk, C. Ngunlianchunga chuan Inrinni khan Pang khuaah ZPM leh MNF chhungkaw zinga mi 121 Congress party-ah a lawm lut.
Lawm luh inkhawmah C. Ngunlianchunga chuan, he inlawmluhnaah hian therhlo leh inthlemna engmah a awm loh thu sawiin, Pathian hnathawh leh mipuite thinlunga Congress sorkar tir leh duhna sang tak awm avanga zawm an nih thu a sawi a, opposition an nih anga engmah pek tur an neih loh rualin, Congress party a sorkar leh hunah Pang khua chu theihnghilh a nih loh tur thu a tiam bawk.
C. Ngunlianchunga chuan sorkar mekin ti lo tura an intiamna an bawhchhia leh mipuite an zah loh zui zel thu sawiin, party thar zawmtute chu hlemhlehna leh thlemtute laka rinawm taka ding tura fuihin, Congress party tan leh Zoram mipui rawngbawltu rinawm ni tura a chah zui bawk.
MPCC Sr. Vice President Lalnunmawia Chuaungo pawhin thusawiin, Congress party chuan sorkarna chelh ngawr ngawr tum luh lovin sorkar tha, ngelnghet leh mipuite phurrit chhawktu siam an tum thu sawiin, ram leh hnam siam tha tura sorkarna chan leh ngei an pawimawh thu a sawi.
Thusawitu dang, MPCC Vice President Zodintluanga Ralte chuan ZPM sorkar chu an thutiam ngei pawh bawhchhia leh bum hmang an nih thu sawiin, CM leh Minister te an hausa chak hle laiin, hmasawnna hna erawh thawh mumal a awm lo thung, a ti a. State University Lungleia din tura hna lakna thlengin chhung leh khat duhsakna nasa tak a awm a, chhim lam mi pakhat mah thun an ni ve lo chu pawi a tih thu a sawi.