Aizawl: Mizoram luidung sangha inthlahpun hun lai a nih avanga Mizoram sorkarin October 10 atanga November 30, 2026 thlenga sangha fuan man phal loh hun, ‘Closed Season’-a puan mek bawhchhiatna chu hmun hrang hrangah hmuhchhuah a ni a, he thila inhnamhnawih mi pahnih hrem tawh niin mi dang pawh dan anga hrem tura hmalak mek a ni bawk.
Fisheries Department chuan report an dawn bawhzuia hma an lakna kal zelah dan bawhchhiatna hrang hrang hi a thleng ngei a ni tih finfiah tawhin, mipui chu dan zawm hram hram turin an ngen nghal bawk.
Department tar lan danin, November 3, 2026 khan Lunglei Pukpui Local Council leh Fisheries Department Lunglei-te chuan dynamo hmanga sangha fuan lai kilogram 10 vel lai lo mantu Lunglei Farm Veng leh Ramthar Veng mi pahnih an man a, Mizoram Fisheries Act Section 10 hmangin hrem an ni.
November 6 khan Airport Road-ah sangha man phal loh zawrh a nih thu report bawhzuiin kawngkam bazara thu Lengte leh Sihhmui mi pahnih hnen atang hian Nghalim kg 1 vel mansak a ni a, anmahni hi November 9-a Fisheries Department Office-a in report tura koh an ni bawk.
November 6 khan Fisheries Department Kolasib chuan Tuichhuahen lui hrai a nih thu report an dawn chu bawhzuiin a hmun an kalchilh nghal a, sangha leh lui nungcha thi tam tak an hmuh avangin dan bawhchhetute manchhuah an nih ngei theih nan Sub-Headquarters YMA Kolasib-te nen tangdunin FIR an thehlut nghal bawk.
Fisheries department chuan dan phal loh hmanga sangha mantute mai bakah a zuar chhawngte thlengin dan anga hrem theih an nih thu tar langin luidung nungcha venhimna kawngah mipui zawng zawng thawhpuina a ngen thar.