Aizawl: Tlawmngai pawl ‘Foundation For Drug-Free Mizoram’ huaihawtin Pathianni chawhnu khan The Salvation Army Bawngkawn Corps Young People (Y.P) leh Home League-te zingah ruihhlo laka fihlim tura campaign hlawhtling tak neih a ni a, he hunah hian mi 48-te chuan an duhthu ngeiin ruihhlo laka fihlim turin an intiam.
Campaign hun hi pawl Adviser Captain C. Vanlalhriatpuia chuan a kaihruai a, MHIP General Headquarters President leh he pawla Executive Council Member ni bawk Lalliani chuan ruihhlo laka fihlim tura intiamte tan hian tawngtaisakna a nei nghal a ni.
He huna Resource Person Mahilda Vanlalvuli chuan ruihhloin mihring taksa a tihchhiat dan leh mi mal, chhungkua leh khawtlang a tihhmingchhiat dan te sawiin, khua leh tui tha an nihna anga ruihhlo laka fihlim tura an inbuatsaih a pawimawh thu a sawi a, ruihhlo tih hi Pathian hlatna awlsam ber a nih thu a sawi bawk.
Adviser Captain C. Vanlalhriatpuia pawhin an pawl rorelna sang ber High Council 2025-na thuchhuah sawiin, tun atanga kum 100 chhungin Mizorama khua zawng zawng tlawh chhuah an tum thu leh Mizoram tan hmathlir thui tak an neih thu a sawi tel bawk a ni.
Foundation For Drug-Free Mizoram hian kumin chhungin hmun 33 an tlawh tawh a, he hmalakna kaltlang hian tleirawl leh thalaite ruihhlo laka fihlim turin mi 3,600 lai an intiam tir tawh bawk.