Aizawl: Mizoram Universal Health Coverage hnuaia Mizoram Universal Healthcare Scheme (MUHCS) kalpui zelna tur atan Asian Development Bank (ADB) atanga loan lak tur installment hmasa ber chu ADB chuan a release ta a, chu sum chu Ministry of Finance kaltlangin November ni 5 khan Mizoram account-ah Rs vbc 205.4858 chhun luh a ni.
ADB loan lak tura he sum hi Disbursement Link Indicator (DLI) pahnih tihhlawhtlin a nih tawh avanga lo awm thei a ni a; Ministry of Finance hian loan anga sorkar hnen a pek hi zaa 10 (Rs vbc 20.5486) chauh niin, zaa 90 (Rs vbc 184.9372) zawk chu grant angin a rawn pe chhuak thung a, he sum hi Healthcare Corpus fund atana dah niin Finance department pawhin hma a la mek a ni.
Finance department hotute tar lan danin, kumin chhung hian DLI pathum tal zawh fel leh tum a ni a, chumi kaltlang chuan Rs vbc 130 vel tal hmuh chhuah belh leh hman tum a ni dawn bawk.
He hma lakna chungchang hi tun thla tira Chandigarh-a Tripartite Review meeting neihah pawh finance department hotute chuan economic affairs department leh ADB hotute hnenah an lo thlen tawh bawk a ni.
ADB loan pumplui hi US dollar maktaduai 108.00 a tling dawn a, he project thawk tan tur hian January 23, 2026 khan agreement sign lo ni tawhin ADB team-te rawn tirhin project effective date atan April 1, 2026 chu lo ruat fiah tawh a ni bawk.