Aizawl: Aizawl East I ZPM Block Conference, Berawtlang Art & Culture Auditorium-a Inrinnia a hmanpuinaah Chief Minister Lalduhoma chuan ZPM kaihhruai sorkar hnuaiah thil thar leh system thar duang chhuak thin mah se, a hmangtu mipui rilru a dik loh chuan ram a dam dawn chuang lo tih a sawi.
ZPM President Lalduhoma chuan sorkar thil thar tihchhuah tam takte zawm a hlawh chho viau thu sawiin, aikal lak phal loh te, doctor-te NPA chungchang leh office kal hma leh ban tlai thuchhuah te pawh mipui leh sorkar hnathawkte’n an zawm tha chho hle tih a sawi bawk.
Lalduhoma chuan ram hmasawnna leh dinhmun dik tak tichhia a dan dik lova pension sum lo la mek mi 700 dawn hmuhchhuah an nih thu sawiin, task force leh khawtlang hruaitute tangkawpin khua leh veng hrang hrang a la endik chhunzawm zel dawn a ni, a ti a. Lirthei chhiah pek chungchangah pawh sorkarin hma a lak chhunzawm zel tur thu sawiin, handholding scheme hnuaia loan latu Mizo thalaite zinga loan rul tha lo pakhat mah an la awm loh thu leh hlawhtlin ngei tuma thahnem an ngai em em vek chu chhuanawm a tih thu a sawi bawk.
ZPM kaihhruai sorkar hnuaiah mipui leh kut hnathawktute an hlim tawh zawk thu sawiin, party mite chu a hranpaa sorkar zar zo kher tum lo vin, eizawnna nghelnghet nei duh tan hma lakna hrang hrang a awm mek thu a sawi a. Neutral mipui pawhin he ram siam tha tura hma lakna kawngah hian mawhphurhna pawimawh tak an nei ve a ni tih inhre thar zui turin chief minister chuan a chah nghal bawk.