Aizawl: Aizawl hmar lam mipuite tui harsatna tihziaawmna tura SASCI Part-I hnuaia Rs vaibelchhe 22.69 senna Aizawl Northern Feeder Pipeline Project hna thawh mek chu Thawhlehni zan khan PHE Minister Prof. Lalnilawma chuan a hmunah enpuiin a tlawh.
PHE minister chuan PHE department a engineer te leh thawk tute thawhrimzia, chhun zan zawma hna an thawh thin thu leh an thawhhlawkzia te a hmuna hmuhpui ngei a duh avanga tlawh a nih thu a sawi a. “Minister ka nih angin an hnathawk lai hi a hmunah ngei tlawh a, an harsatna leh an dinhmun te, an thawhrim zia te hi mit ngei a hmuhpui mai bakah, an tha ti chak zel turin ka awm reng a ni tih hi an hriat ka duh a ni,” a ti.
Prof. Lalnilawma chuan pipe phum mek avanga kawngpui kal buai leh mipui nunphung tihbuai a ni chu pawi a tih thu sawiin, he project hian mipui tana tui hnianghnar zawka pek a tum avangin mipuite hriatthiamna leh thawhpuina a ngen a ni.
Mizoram sorkar chuan Aizawl khawpui chhunga tui pek dan tihchangtlun nan SASCI Part-I hnuaiah he project hi a kalpui a, he hnaa pawimawh ber pakhat Laipuitlang tuizem atanga Aizawl hmar lam veng hrang hranga tui sem chhuahna pipeline lian pathum siam mekah Durtlang, Zemabawk leh Thuampui Zonal tank phum hnate thawh mek a ni.
He pipeline thar hian house water connection 13,354 vel nghawngin Durtlang, Selesih, Sihphir, Neihbawih, Nausel, Zuangtui, Muanna Veng, Falkland leh a chhehvel veng hrang hrangte tui hnianghnar tak an pe thei dawn a ni.
February 2027-a zawh fel tura beisei he project hi Aizawl Water Supply Scheme Phase-III (37 MLD capacity) tui pump chhuah zung zung nan leh mipui hnen thleng tura ruahman a ni.