Hachhek Bial Kuhva Chingtu Pawl (HBKCP) bultumin November 10 leh 11 khan Kawrthah khelmualah ‘Rinawmna leh Taimakna’ tih thupui hmangin Kuhva Kût vawi 2-na hman a ni a; a ni hnihnaah Chief Minister Lalduhoma chuan khuallian niin a hmanpui.
Lalduhoma chuan thu sawiin dan lova kuhva tawlh ruk veng tur leh kuthnathawktute chhan nan sorkar leh tlawmngai pawlten hma an lak ho tak avangin kuhva tharchhuah hralhna kawngah harsatna a awm tawh lo tih a sawi a. Kum 2025 kha Mizoram chanchina kuhva hralh hnem ber kum a nih hial thu a sawi.
Chief minister chuan kum 2025-26 chhung khan Mizoram chhunga kuhva huan hectare 67,380-a zau atangin quintal 5,12,000 vel hralh a nih thu sawiin, sorkar flagship scheme Bana Kaih Scheme hnuaiah huan siam tihchangtlung zui zel a nih tur thu leh khawthlang lamah rubber leh sangha khawi uar deuh deuh tum a nih thu a sawi bawk.
Kuthnathawktute thar chhuah hlu zawk leh mumal zawka sawngbawl a nih theih nan Zamuang leh Chemphaiah kuhva sawngbawlna tur din mek a nih bakah sawhthing sawngbawlna unit-te pawh bun mek a nih thu leh, kuhva tam hri laka huan hrang hrangte an him theih nana zirchiannate pawh central agriculture minister hnenah bawhzui tura thehluh a nih tawh thu, Lalduhoma’n a sawi.
He hunah hian chief minister hian Aster Volunteer Program leh UDS Foundation ten CSR cell atanga an tum Mobile Medical Unit chu Mamit DC hnenah a hlan nghal a ni.
Khual zahawm Land Resources, Soil & Water Conservation Minister Lalthansanga pawhin Hachhek tlang dung mipuite taimakna chhuanawm a tih thu sawiin, rubber mission bakah hian ‘Chief Minister Fisheries Mission’ pawh kalpui tura ruahman mek a nih thu a sawi a; Kut thlengtu Hachhek bialtu MLA Robert Romawia Royte pawhin eizawnna atana kuhva hmangtu chhungkaw tam tak a awm avanga he kut hi buatsaih zui zel a nih tur thu sawiin, bial chhunga chhungkaw harsate dawmkan nana kuhva tiak nuai khat sem tawh leh kum thara nuai thum sem leh tum a nih thu a sawi bawk a ni.