Ukraine-a indona awm mek tihtawp tuma Abu Dhabi-a Russia, Ukraine leh US inbiak ni hnihna a zo va, rah tha chhuah hmel erawh a awm chiah lo.
American palaite chuan ‘thil inhawng’ an hmuh thu an sawi rualin kum nga kal ta atanga Russia-in Ukraine a rûn avanga indo tawpna tur hmel erawh a la lang chiah lo.
Ukraine atanga palai kal zinga mi, Davyd Arakhamia-a chuan February hnua inbiak lehna hmasak ber hi ‘a khirh tak zet’ tih a sawi.
“Russian-te hi khuahkhirhna khauh tak nen an lo kal niin ka hria a, thil sawiho a khirh tak zet a ni,” a ti a. Hetih rual hian ‘boruak kal a tha’ a, inbiak thawh hnihna chu a hma thei anga huaihawt a nih tur thu a sawi.
Moscow leh Kyiv chuan indonaa mi an inmansakte hlawm lian taka inthleng tura buaipui zui a nih thu leh inthleng thuai a nih tur thu an sawi ve ve.
Inbiak zawh, Ningani khan US palai pahnih, Steve Witkoff-a leh President Donald Trump-a makpa, Jared Kushner-a te chuan Moscow panin Russian President Vladimir Putin-a an hmu zui ang a, Dublin-ah Ukrainian hruaitu, Volodymyr Zelensky an hmu leh bawk ang.
Tun tuma inbiaknaah hian Europe khawmualpui ‘himna tur ruhrel’ siam chu an thupui ber a ni.
Kyiv tan Nato member a nih loh pawhin Ukraine-in beih a tawh leh a awm chuan an thawhpuiten an puih theihna tur a ni a. Moscow tan Nato-in Europe khawchhak lam, Kremlin-in a kawmngeihte rama huang a zauh zelna tur tihtawp a ni bawk ang.
Kar tir khan Kushner-a chuan US hian Ukraine, Russia leh Europe tana himna tur ‘kal dan tur thar’ siam a beisei thu leh chu chu ‘muanna tluantling’ a awm theihna tur a nih thu a lo sawi tawh a. Hetih lai hian Kremlin pali, Vladimir Medinsky-a chuan khawvelin himna kalphung ‘thar leh dik’ a mamawh tih a sawi ve bawk.
Ukraine leh Europe hian US thuneituten European himna a ngaihdan hi an ngaimawh rei tawh a, Kremlin tana nem leh viau si-ah an ngai a ni.
Britain, Nato leh EU ram palaite pawh Abu Dhabi-ah hian awmin US leh Ukrainian palaite pawh an kawm hlawm a. Hetih lai hian EU-in official taka a biak loh, Kremlin chuan an palaite hi mi dangin an be lo niin an sawi.
Moscow hian European-te inrawlh hi a duh lo va, European-te ve thung hian indo zawh hnua an khawmualpui himna an ngaihven ve reng thung.
Mi tam tak, a bikin Europe khawchhak lama mite chuan an himna chu Ukraine nena inzawm tlat niin an ngai a. Nilaini pawh khan German sorkar thupuangtu chuan inremna chu ‘Nato member ramte rawnna leh an himna tel lo chuan’ a taka hman theih loh niin a sawi.
Ukraine indona tihtawp tum hian nikum atang khan inbiak tan a ni a, an mutan lian tak dang chu Ukraine khawchhaka Russia-in a tam zawk an luah, Donetsk region chungchang a ni a. Moscow chuan an luah chin chu Ukraine-in pe mai se an duh laiin Kyiv erawh hian a vaia neih an duh ve thung.
Donetsk chungchang hi inbiaknaa thil harsa lai ber a nih thu pawh Kushner-a hian a lo sawi tawh.