Manipur-a Kangpokpi district-ah hel pawl nia rinte Ningania an inkahnaah Kuki hmeichhia a thi a, mipa pakhatin hliam a tuar bawk tih thuneituten an sawi.
Hel pawl inepte inkara inkahna hi Kangpokpi-a Taphou Kuki khaw bul leh an thenawm, Senapati district-a Kailengjang bulah Ningani chawhma dar 11:00 vel khan an inkap nia sawi a ni.
Silaimu leng vel hian Taphou Kuki khuaa cheng hmeichhia, a bul lawk lova hna thawk chu fuhin a thi a. A ruang an hmuh lai hian buh sengna favah pawh a lo la hum a, tual chhung mi leh venhim hna thawktuten a ruang hi an hmu a ni.
Hliam tuar hi Kangpokpi district-a mi mal damdawi inah enkawl tura dah a ni bawk.
Hel pawl inkahna hi Kangpokpi-a Committee on Tribal Unity-in tun hnaia Taphou Kuki khua atanga Kuki-Zo pahnih ruk bote zawn leh a titute dap chhuahna kawnga thuneitute chet dan an duh khawp loh avanga district khawpuia sit-in demonstration an huaihawt mek laia thleng a ni.
COTU hian Taphou Kuki khua hi Senapati district police station hnuaia a awm thinna atangin Kangpokpi district police kuta awm turin an phut a ni.
Kuki thalai pahnihte hi Taphou Kuki khaw huam chhung atangin October 28 khan an chin hriat lohvin an bo va, November 1 khan an district thenawma Senapati-ah an ruang hmuh zui a ni.
Thalai pahnih ruk bo leh thah an nih avang hian COTU chuan Kangpokpi district pumah ‘total shutdown’ an lo kalpui tawh bawk.
Manipur Police ADGP Lhari Dorjee Lhatoo-a chuan Thawhlehni khan Kuki thalai pahnih chunga thil thleng hi state sorkar chuan National Investigation Agency (NIA)-in a chhui zui tura tih tumin hma a la mek tih a sawi.
“NIA kuta dah tura sorkarin hma a lakna tan a ni tawh a, thil tul dangte ngaihchan mek a la ni,” a ti.