Tun hnaiah Mizote chhe thei ang bera sawiin, khawvel hmaah Chakma nu pakhat chuan thu a sawi a, ngaihdamna dilna siam sasawi ve mahse, a pawi tur angin engkim a pawi vek tawh.
A ngaihdam dilnaah a duh reng vanga sawi a nih loh thu leh sawi luihtir a nih thute hriat a ni a, a sawi hi a ni tak tak a nih ngat phei chuan thoil tha lo leh buaina zakhua thleng zui thei a ni lehzual.
Mizo mipuite lung a dam lo a, kan rama awm ve kan hnam peng pawh ni lovin khawvel hmaa heti tak maia min sawi duh ta mai hi a thinrimthlak hle.
Hetiang hi kan boruak a nih mek laiin kan missionary pakhat thlan, tha taka siam chu Chakma thenkhatten an lo suasam leh bawk a, a thinrimthlak hle bawk. Chutah Chakma khua pakhatah Kristian te an inphum tur chu an thlan laihsa vek chu Chakma ring lo miten phal lovin an lo vursak leh hmak bawk! Heng zawng zawng hi Kristian ram tia i chhuan em em, Mizoram tia intineitu taka i chenna rama thleng vek a ni lehnghal aw..
Min deptu leh kan pangsi renga awm Chakma te heti tak maia an rawn pawng ta hi a thinrimthlak a, dik lo nia min hriatnaah chuan dan hmanga hmalak tum mai se, chuti ni lova a inchhaih leh insawichhe zawnga hmalakna erawh hi chu pawm zam a har a, boruak lum hi a chhuak thut mai ang tih a hlauhawm thin.
Kan rama cheng leh khawsa Chakma te hian awmdan tawk thiam se la, an hruaitu fel tak takte pawh hian an nauten an hnam hmel an tihbalh dan hi hrerengin, a zai zap leh ram neitute thinrimna thleng lo zawnga awmtir dan zawng mawlh teh se.