ASUTP ruahmanna a tha thawkhat – Mahse, ka lawm a kim lo

  • K. Hmingthankaia

City bus-te an stand-a rei tak tak an ding thin ka dodalna hi a rei ta hle mai a. Ka theih dan danin, Transport Minister, Transport Director, Traffic SP leh ACBOA lamte pawh ka lo sawipui tawh thin a. City bus lam nen pawh kan lo intihbuai phah deuh rap rap tawh a ni. Chanchinbuah pawh vawi tam ka lo ziak tawh bawk thin a ni. A changin na takin ka ziak a, a changin tlawn angreng, fuih angrengtein ka ziak thul. A changin sawrkar chunga lawmthu sawina ka ziak a, a changin sawrkar chunga lawmthu ka lo sawi thawt thawt chu ka zah leh thute pawh ka ziak leh thul. Sawrkarin thupek han chhuah ve bawk mah se, dawt mai a nih thute thleng pawhin ka lo ziak tawh thin a ni. Mahse, chu’ng ka beihna zawng zawng chuan awmzia a nei thei chuang lo a ni.

Mahse, Transport Minister hmaa, ‘He thilah hian beidawn ka tum miah lo a nia aw’ ka lo tih tawh angin, ka hlawhtlin hma chu ka beih chhoh zel dan tur indawt chu ka duang lawk vek tho a ni. Ka damlaia ka bei hlawhtling ta lo a nih pawhin, he khawvel leh he Mizoram Aizawl hi a lo la awm ve zel te a nih a, a lo changkang chho ve zel te a nih a, City bus din veng veng hunlai chu thil mak sawia an la rawn sawi hunah chuan, ka lo beih nasat zia tal hi chu an la rawn sawi ve tho ang, tiin, beidawn ka tum miah lo a ni.

Tichuan, chanchinbu lama ziak tawh lovin, Home Minister hnenah traffic police-te khauh zawk leh marpata che turte, UD&PA Minister a nih bawk avangin, city bus mawi tak leh an service dan fel takte chu khawpui timawitu a nih thute chu sei deuh takin ngenna ka ziak leh ta a. Ani pawhin a va sei em em ve tih pahin kan infiam nual a. A copy pawh Transport Minister, Transport Director leh Traffic SP te pawh ka pe ve thlap bawk a ni. Hetah pawh ka la hlawhchham fo a nih chuan ka kal leh zel dan tur thui tak ka ruahman zinga a dawt leh chiah chu Chief Minister hnen a ni.

Mahse, tunah hian chu ka lehkha nghawng chu emawni, city bus ho chuan tlem chuan thu chu an zawm ve ta deuhva, mahse, a theih dan dana dan bawhchhiat chu an la tum ta tang tang tho a ni. Hmun hran hrana chhuanlam siama an din rei luih deuh hram hram bakah, Chandmari-ah phei hi chuan innghah chhuah ngei ngei tur emaw an la ti ta reng a nih hi. An rilru leh thisenah dan zawm loh kha a lo bet tlat tawh a, dan nunpui kha an thiam thlawt tawh lo a nih hmel. Mi ram leh mi state te anga dan nunpuia an tlan ve zar zar hun a nghahhlelhawm hle a ni.

Tunhnaiah khawpui tawt tih ziaawmna tur ruahmana rintlak, Aizawl Sustainable Urban Transport Project (ASUTP) Chief Minister hova thu khawm chuan ruahmanna tha famkim angreng tak mai an neih ho chu an rawn puang chhuak ta a, Chief Minister meuhvin public transporter-ten hun vawn dik tul a tih thute pawh a rawn sawi ve tak hial kha, eng tak ang zel ang maw.

Aw le, city bus chungchang kha chu sawi tawh hrih lo ila. Tuna ka sawi tum ber zawk chu hei hi a ni. Hun rei tak atanga ka lo rawt tawh, tun ZPM sawrkar tirh pawha an sawrkar chhung ngeia an tih hlawhtlin tura ka lo ngen tawh leh, an sawi rik ve tak ngai miah loh avanga reminder pawh ka lo ziah leh tawh, tuna central sum tam tak hmanga thawh tur he project nena inrem em em mai si hi an sawi tel ve leh ta tlat lo mai hi a mak ka ti a ni. Chu chu, Aizawl tlangdung kawngpui pengthuam pawimawh zawng zawnga kawng chunga mihring kea kalna tur, flyover/overbridge mawi tak siam hi a ni.

Kulikawn Tlangnuam pengthuamah, Thakthing Damveng pengah, Mission veng Biakin bulah, Sikulpuikawnah, tuna Khatlaa mi hi a famkim tawk lo, Tennis court bulah, Treasury square pengthuam chhak leh thlang hi inzawm veka siam, Temple square-ah, tuna Bazar Bungkawna mi hi a famkim tawk lo bawk, a theih chuan civil hospital gate pui pengah, Thana pengthuamah, Zarkawt pengthuamah, Chandmari lehlam lehlamah, Chaltlang Dawrkawnah, Bawngkawn Sairang pengthuamah, Bawngkawn-Durtlang-Thuampui pengthuamah, Thuampuiah, Zemabawk TB hospital pengahte bakah, Vaivakawn pengthuam leh Dawrpui Vengthar- Dinthar pengthuamahte hian siam ngei ngei ngai niin ka hria a ni.

Heng hmunahte hian nakinah chuan siam a la ngai ngei thoin a rinawm a, mahse, chutih hunah chuan a buaithlak lehzual tawh dawn si a. Tunah pawh hian ka rawt tirh aite kha chuan a buaithlak fe tawh zawk ngei anga, mahse, nakina a buaithlak zual lehzel hmaa tuna lo siam tawh mai hi ka han rawt ve leh ta a nih hi.

Nileng thaka city bus-ten an stand an luah tlat hian lirthei che vel leh kea kalte a tibuai em em thin a, khawpui boruak a ti thawpik lehzual em em bawk thin a ni. Kawng pengthuam laia mihringin kawng kan kan lo tum ve reng hian lirthei kal tluanglai a tibuai fova, chubakah, mihring leh lirthei tan chetsual a hlauhawm em em bawk a ni. Flyover mawi tak siam hi kea kalte tan a that bakah, khawpui cheina a ni nghal bawk a. Tin, hahchawlh nante, mei zuk nan leh phone hman nante a remchang em em bawk a ni.

Chuvangin, he ASUTP nena inrem tak leh tuna pawisa awm remchan laia hma lak lai ngei hian he ka rawtna hi telh ve ni se ka han ti a ni e. Tin, public transport man tlawm ber city bus mawi tak leh service tha leh zahawm, mipuiin khawilo kal vel nana rintlak kan neih theihna tur ruahmannate pawh han nei tel leh teh u, tiin, he mipui sawrkarah hian kan han pangchang leh ta a nih hi.

Leave a Reply

error: Content is protected !!