Hormuz-ah tuipuia thawk mi 25 an thi tawh tih UN sawi

UN chuan February thla atanga US-Israel leh Iran indona a chhuah atangin Strait of Hormuz leh a chhehvelah tuipuia hna thawk 25 vel thah an ni tawh tih a sawi.

UN hnuaia Middle East, Asia & Pacific Assistant Secretary-General Khaled Khiari-a chuan Zirtawpnia UN Security Council thutkhawmah November 11 thlenga an chhinchhiah chin a nih thu a sawi.

“Hetiang dinhmun hi thil pangngai ni thar ta anga pawm theih a ni lo,” a ti a, ‘heng lai velah hian zalen taka lawng veivah theihna a awm leh theih a ngai’ tiin a sawi bawk.

Hormuz leh a chhahvel tuipuia himna hi a derthawng telh telh nia sawiin October chu buaina a chhuah atanga thi an tam ber tum niin a sawi.

UN hnuaia International Maritime Organization (IMO) chuan March 1 leh November 11 inkarh khan Hormuz leh Middle East huam zau deuh chinah lawngten himna thila fel lo vawi 136 an tawk niin a chhinchhiah a. Heng zinga 35 hi October-ah niin November-ah 10 a awm tawh bawk.

Khiari-a chuan “Ni tin tuipuia thil tha lo thleng hi a awm reng,” a ti a. “Heng thilte hi ngaihzam chi a ni lo va, civil mite lawng leh sumdawng lawng hi bitum tur a ni lo,” a ti.

UN-in hetiang a puan mek lai hian Inrinni khan Iranian thuneitute chuan Hormuz-ah tuialhthei phur pathumte ‘phal loh leh khuahkhirh china’ an kal laiin chil puah bomb su puakin an kang tih an puang.

Tehran hian lawngte hi buaina a chhuah atang khan tui kawng zawh turin an phalna la hmasa zel turin a ti a, an dan zam zawm lo nia an sawite chu an bei fo tawh.

“Strait of Hormuz khawchhak lama khuahkhirh chin dai lawngte chu lawng sipaite dah chilh puah bomb suin an kang zel ang,” tiin Iran-a lawng sipaite hian thu an chhuah tih an rama IRIB broadcaster chuan a lo puang tawh.

Iranian thuneitute chuan tui kawng hi US-in an thil phut chi hrang hrang – an lawng chawlhna a dansak hlih te, eibara a hrekna hlih te, Iranian-te thil neih a hrek te, kil tina indona tihtawp te leh indona tawpna a puan hma loh chuan an hawng dawn lo tih an lo sawi tawh thin.

US sipaite erawh chuan strait-a kawngpui lian ber lai chu sumdawng lawngte kal theih turin chil puah bomb awm an thian fai vek tawh tih an sawi ve bawk.

United Kingdom Maritime Trade Operations (UKMTO)-in a chhut dan chuan indona chhuah hma dinhmun atangin Strait of Hormuz-ah hian lawng kaltlang hi 65% velin an tlem zawk.

UN Security Council-ah hian Khiari-a chuan ‘Middle East-a tuipuia veivah chu a man a sang a, thil thleng tur sawi lawk a har a, a him lo’ niin as awi.

“Tuipuia zalen taka veivah theih loh hian khawvel pum a nghawng a, energy, transport, tuialhthei man a sang a. Ei leh in tura him lohna tam tak a thlen bawk,” a ti.

Leave a Reply

error: Content is protected !!