Assam-a bus leh truck insu-ah mi 24 vel an thi a, mi dang 11-in hliam an tuar bawk.
Chetsualna hi Zirtawpni chawhnua Unesco World Heritage site, Kaziranga National Park bula thleng niin hliam tuarte hi Jorhat Medical College & Hospital-ah dah luh an ni.
Thi zinga tam tak hi college zirlai lai niin Assam Rural Development Minister Atul Bora chuan a sawi a; mahse, tute nge an nih erawh an la puang lo thung.
Bora chuan thil thleng hmututen lirthei pakhat zawk hi a tlan chak hle tih an sawi niin a sawi a, hetih rual hian ‘chetsualna thlen chhan tak hi chhui phawt loh chuan a hriat loh’ tih a sawi bawk.
Assam Chief Minister Himanta Biswa Sarma chuan tawhsual thleng chuan ‘kan zavaiin min nghawng a ni’ tih X-ah a tar lang.
“Kan ngaih pawimawh ber chu hliam tuarten tikhawtlai lova enkawlna tha ber an dawn theihna tur a ni,” a ti bawk.
Bus hi passenger phur, Bokakhat atanga Nagaon pana tlan lai a ni.
Bokakhat hi khawvel huap pawha hriat hlawh, samak ki khat chauh nei awmna hmun, Kaziranga National Park luhka (gateway) tia hriat lar a ni.
Nagaon pawh hi lo neihna hmun pawimawh leh Assam lailia sumdawnna hmun lun tak a ni a, Bokakhat atangin lirtheiin khawthlang lam km 120 chuang hreta hlaa awm a ni.
Assam-a eptu party lian ber hruaitu, Lurinjyoti Gogoi-a chuan an state-ah kawngpuia himna tha tawk awm lo chun hun rei tak ata tawh an buaina a nih thu a sawi.
“Sorkar hian ngai pawimawhin tih tak zetin hma a lak ngei a ngai a ni,” a ti.
India-ah hian kum tinin kawngpuia lirtheia chetsualna avang hian mi sang tel an thi thin.
Kum 2023 khan India-a kawngpuia chetsualna thlengah mi 1,72,000 thi anga chhinchhiah a ni a. Ni khatah mi 474 thi ziah ang leh minute thum dan zela mi pakhat thi ang zela chhut theih a ni.
Kum 2025-ah khan hei aia tam zawk, mi 1,83,382 thi an awm leh bawk.
Mi thiamte chuan kawngpuia chetsualna thleng thin hi kawngpui tha lo leh enkawl uluk loh vang chauh a ni lo va. Mihring khawsak dan, rilru puthmang leh dan kenkawhna leh kalphung rintlak loh vang a ni tel tih an sawi.