WOMEN’S U23 T20 TROPHY: Vuak leh vawma bul tan tha Mizo nulaten run 51-in Meghalaya hneh

Vuak leh vawmah tha taka bul tan ve vein Women’s U23 T20 Trophy Plate-a group league-a an inlan vawi hnihnaah run 51-in Mizo nulaten Meghalaya an hneh a, khelh hnihah chak ve vein hma an hruai.

Police Training Academy Ground, Agartala, Tripura-a inkhelah thum vawrah Mizoram chakin vuak hmasak an thlang a, opener pahnihin tha takin bul an tan.

Over 20 khelh turah a zahve an khelh tlin hnu, over 10.1-ah wicket hmasa ber hloh chauhvin Tlangnuam Vengthar, Aizawl nula, Vanlalruatpuii’n ball 30 a hmachhawnah run 33 a tlin hman a; bul a tanpui, Jacinta Laltanpuii nen run 72 an thawk chhuak hman.

New Chalrang nula, Jacinta-i hian ball 51 a hmachhawnah run 44 thawk chhuak zuiin over 17.1-ah a thi a. Opener pahnihte hnua lut, captain Lalhmangaihsangi (run 18) leh Thelma Laldinthari (21) ten an thawh hlawk zui bawk a, over 20-ah run 132 siamin mi panga an thi.

Mizo nulate run siam hi tun inelna (Plate bikah) team khatin run an siam tam ber a ni a. Meghalaya-in an umnaah bul an tan tha lo va, Mizo bowler-ten tha taka bul tanin ZD Lalnunhrili leh Thelma-i ten run siam miah lo ve vein an opener pahnih an vawm thi nghal.

Meghalaya batter zingah Jayshree Singh-i’n run 46 thawk chhuak thei mah se a thiante zingah run 10 vaw chhuak tling tumah an awm lo va, over 20-ah mi pariat thiin run 81 an tlin thei hram a ni.

Mizoram tan Thelma-i leh Sandhia Rai-i ten mi pahnih ve ve an vawm thi a, ZD-i leh captain Mami ten wicket khat ve ve an la bawk.

Tripura-a Women’s U23 T20 Trophy Plate inelna kal mekah hian Mizo nulate hian Inrinni khan an khelh vawi khatnaah wicket rukin Sikkim an lo hneh tawh bawk a. Plate-a team paruk awmah Manipur nen vawi hnih khelha chak ve ve awmchhun niin point riat ve ve an hmu a, net run rate-a sang zawk Mizoramin hma an hruai.

Thawhlehniah Nagaland an hmachhawn leh dawn a, an chak leh chuan final lut turin an dinhmun a tha viau thei dawn a. A hnuah Arunchal Pradesh leh Manipur nulate an hmachhawn leh bawk ang.

Women’s U23 T20 Trophy Plate hi Board of Control for Cricket in India (CBBI) hnuaia la hnufual state parukin an khelh niin an inkhelh kual chhuah hnuah a sang pahnihin final an lut dawn a, champion chu season lehah a thiam rual, elite-ah an kai dawn a ni.

INKHEL KHAIKHAWMNA:
MIZORAM – 132/5 (Over 20)
Jacinta Laltanpuii – 44 (51)
Vanlalruatpuii – 33 (30)

MEGHALAYA – 81/8 (Over 20)
Jayshree Singh – 46 (55)
Thelma Laldinthari – 2/7 (Over 2)

Run 51-in Mizoram an chak.

Leave a Reply

error: Content is protected !!