Aizawl: Chawnpui, Aizawla sak mek PM Ekta Mall hna thawh mek dinhmun chu Thawhtanni khan Mizoram Chief Secretary Khili Ram Meena, IAS leh sorkar laipui Ministry of Commerce & Industry hnuaia Department for Promotion of Industry and Internal Trade (DPIIT) Director Mohammed Isharar Ali-te hovin thlirho a ni a, ruahmanna hun tiam December 2027 ral hmaa sak zawh hman ngei tumin theihtawp chhuah mek a ni.
Prime Minister programme pawimawh tak a nih angin DPIIT chuan state hrang hrangah a hun taka project zawh a nih theih nan hma la mekin, Mizoram tlawh tura ruat Mohammed Isharar Ali leh Chief Secretary-te hnenah project status report pek a ni.
State thenkhatin a hmun tur an la zawn mek laiin, Mizoram hmalakna leh a hmunhma harsat dante a hmuna endik a nih hnuah Ministry lam chuan hna kal mek chinah lungawi thawkhatin, chak zawka hmalak dan turte stakeholder hrang hrang — HITES Ltd., IIFCL Ltd., Ardeco, SPG leh Mizoram PWD aiawhte nen an sawiho a ni.